लोणावळा एसटी स्थानक नूतनीकरणास मंजुरी ः सरनाईक

लोणावळा एसटी स्थानक नूतनीकरणास मंजुरी ः सरनाईक

तळेगाव दाभाडे, ता. १० ः लोणावळा एसटी बसस्थानकाच्या नूतनीकरणाची निविदा प्रक्रिया अंतिम टप्प्यात असून लवकरच प्रत्यक्ष कामाला सुरूवात होणार असल्याचे राज्याचे परिवहन मंत्री प्रतापराव सरनाईक यांनी नुकतेच सांगितले.
लोणावळा एसटी बस स्थानकाची झालेली दुरवस्था आणि प्रवाशांना भेडसावणाऱ्या समस्यांबाबत मावळचे आमदार सुनील शेळके यांच्याकडून त्याचा सातत्याने पाठपुरावा केला जात होता. त्याबाबत मुंबईतील विधान भवनामध्ये बैठक झाली. त्यावेळी सरनाईक यांनी वरील आश्वासन दिले. या बैठकीत शेळके यांनी स्थानकाची विदारक स्थिती, प्रवाशांना भेडसावणाऱ्या अडचणी आणि मूलभूत सुविधांचा अभाव यांची सविस्तर माहिती मंत्र्यांसमोर मांडली. नागरिकांना दररोज प्रवास करताना होणाऱ्या गैरसोयीचा उल्लेख करत, नूतनीकरणाची तातडीने अंमलबजावणी व्हावी, अशी आग्रही मागणी केली. त्याला सरनाईक यांनी सकारात्मक प्रतिसाद दिला.
सरनाईक म्हणाले, ‘‘नूतनीकरणाचा प्रकल्प सार्वजनिक - खासगी भागीदारी (पीपीपी) तत्वावर राबविण्यात येईल. नवीन बस स्थानकात स्वच्छतागृहे, कॅफेटेरिया, हॉटेल, व्यावसायिक दुकाने, प्रतिक्षागृहे, प्रवासी माहिती केंद्र आदी आधुनिक सुविधा उपलब्ध असतील. प्रवाशांच्या सुरक्षेसाठी अत्याधुनिक तंत्रज्ञानाचा वापर केला जाईल.’’
मावळच्या जनतेसाठी सोयी-सुविधा निर्माण करणे हे माझे कर्तव्य आहे. या प्रकल्पाची वेळेत अंमलबजावणी होण्यासाठी प्रत्येक टप्प्यावर लक्ष ठेवले जाईल, असे शेळके यांनी स्पष्ट केले.