पोलिसांच्या सतर्कतेमुळे चिमुकला आईच्या कुशीत !

तळेगाव दाभाडे, ता. ११ ः आजीकडे तळेगाव एमआयडीसी परिसरात राहायला आलेला विहान नावाचा चार वर्षांचा मुलगा हरवला होता. मात्र, इंदोरी पोलिसांच्या सतर्कतेमुळे अवघ्या काही तासात तो आईच्या कुशीत विसावला. ही घटना बुधवारी दुपारी एकच्या सुमारास घडली.
इंदोरी पोलिस गस्त घालत असताना कॅडबरी कंपनीजवळ एक चिमुकला मुलगा रडत उभा असल्याचे त्यांच्या लक्षात आले. पोलिसांनी त्याच्याशी संवाद साधला असता, त्याने आपले नाव ‘विहान’ असल्याचे सांगितले. तो हिंदीत बोलत होता आणि चौकशीतून तो गुजरातमधील असून, सध्या आई व लहान बहिणीसह आजीकडे राहायला आल्याचे त्याने सांगितले.
पोलिसांनी लगेचच परिसरात शोधमोहीम सुरू केली. काही वेळातच एका महिलेने तिचा मुलगा हरवल्याची माहिती दिली. पोलिसांनी ती महिला शोधून काढली असता, तीच विहानची आई असल्याचे स्पष्ट झाले.
तळेगाव एमआयडीसीचे वरिष्ठ पोलिस निरीक्षक रणजित जाधव, पोलिस उपनिरीक्षक प्रशांत रेळेकर, हवालदार शेख, कॉन्स्टेबल कोठावडे व भोसले यांनी ही कामगिरी केली.

फोटोः 03290