रोटरी क्लबचा पदग्रहण कार्यक्रम उत्साहात

तळेगाव दाभाडे, ता. १४ : रोटरी क्लब ऑफ तळेगाव दाभाडे सिटीचा दहावा पदग्रहण समारंभ उत्साहात पार पडला. डिस्ट्रिक्ट गव्हर्नर नितीन ढमाले यांच्या प्रमुख उपस्थितीत झालेल्या या कार्यक्रमात अध्यक्षपदी भगवान शिंदे, उपाध्यक्ष-सुरेश दाभाडे आणि सचिवपदाचा कार्यभार संजय मेहता यांनी स्वीकारला.
या वेळी प्रमुख पाहुणे म्हणून आमदार सुनील शेळके उपस्थित होते. त्यांनी भंडारा डोंगर, घोरावडेश्वर डोंगर व गहुंजे या भागांमध्ये अत्याधुनिक तंत्रज्ञानयुक्त शाळा उभारण्याच्या रोटरी क्लबच्या संकल्पाचे स्वागत केले. याचबरोबर एक लाख वृक्षांची लागवड करण्याचा संकल्पही या वेळी करण्यात आला.
प्रकल्प प्रमुख संतोष शेळके यांनी प्रास्ताविक केले. क्लबच्या कार्याचा आढावा सुरेश दाभाडे यांनी मांडला, तर अध्यक्षांचा परिचय सुरेश शेंडे यांनी करून दिला. शंकर महाराज मराठे यांना रोटरी व्होकेशनल अवॉर्डने गौरवण्यात आले. यावेळी नितीन ढमाले, भालचंद्र लेले, विवेक दिक्षित, सभापती शांताराम कदम, नंदकुमार महाराज भसे, साखर कारखाना संचालक सुभाष राक्षे, नरेंद्र ठाकर आदी उपस्थित होते. सूत्रसंचालन डॉ. मिलिंद निकम आणि वैशाली कोयते यांनी केले.