कामशेत खिंडीत अपघात; चालकाचा जागीच मृत्यू

तळेगाव दाभाडे, ता. १८ : जुन्या मुंबई-पुणे महामार्गावर कामशेत खिंड येथे एका वळणावर आज सकाळी साडेसातच्या सुमारास झालेल्या भीषण अपघातात टेम्पो चालकाचा जागीच मृत्यू झाला. या प्रकरणी कामशेत पोलिस ठाण्यात गुन्हा दाखल करण्यात आला आहे. ऋषीकेश भाऊसाहेब बुगे (वय २७, रा. बुगेवाडी, ता. पारनेर, जि. अहिल्यानगर) असे मृत व्यक्तीचे नाव असून, तो मालवाहू टेम्पो (एमएच १६ डीपी १७११) चालवत होता. उतारावर असलेल्या वळणावर त्याचे नियंत्रण सुटल्याने टेम्पो थेट डिव्हायडरवर आदळून विरुद्ध लेनमध्ये पलटी झाला. अपघाताची तीव्रता इतकी होती की पलटी होत असलेल्या टेम्पोमधून उडी मारताना ऋषीकेश खाली पडला. या वेळी त्याच्या डोक्याला, छातीला व हात-पायांना गंभीर इजा होऊन त्याचा घटनास्थळीच मृत्यू झाला.
---