तळेगाव दाभाडे येथे विकासकामांचे भूमिपूजन, लोकार्पण

तळेगाव दाभाडे, ता. २२ : शहरात ११ कोटी ३६ लाख रुपयांच्या विविध विकासकामांचा भूमिपूजन आणि लोकार्पण सोहळा रविवार (ता.२०) पार पडला. कार्यक्रमात आमदार सुनील शेळके यांच्या हस्ते विविध कामांचे उद्घाटन आणि भूमिपूजन करण्यात आले.
यात तळेगाव स्टेशन तळे येथे जलशुद्धीकरण प्रकल्पाचे लोकार्पण, संताजीनगर येथील काँक्रीट रस्त्याचे लोकार्पण, आमराई हॉटेलसमोरील मुख्य रस्त्याचे भूमिपूजन, लिंब फाटा ते मॅकडोनाल्ड समोरील सेवा रस्त्याचे भूमिपूजन, सरसेनापती उमाबाई दाभाडे कन्या शाळेच्या नवीन इमारतीचे भूमिपूजन, शहरातील ‘स्मार्ट’ सुरक्षेसाठी सीसीटीव्ही प्रकल्पाचे भूमिपूजन करण्यात आले.
तसेच श्री डोळसनाथ मंदिर परिसराची प्रत्यक्ष पाहणी, बनेश्वर स्मशानभूमीतील काँक्रिट रस्त्याची पाहणी, नगर परिषदेच्या वाहनतळासाठी आरक्षित जागेवर वृक्षारोपण, मोहोर प्रतिमा, एंजल हिल्स, संस्कृती सोसायटी, राव कॉलनी, म्हसकरनिस सोसायटी या परिसरांत भेटी देऊन नागरिकांच्या समस्या जाणून घेणे या उपक्रमांचेही आयोजन करण्यात आले.
या कार्यक्रमाला शहरातील अनेक नागरिक, सामाजिक संस्था, आजी-माजी लोकप्रतिनिधी, शासकीय अधिकारी, आणि विविध पक्षांचे कार्यकर्ते मोठ्या संख्येने उपस्थित होते.
आमदार सुनील शेळके म्हणाले, ‘‘तळेगाव दाभाडे शहरात जे भूमिपूजन आणि लोकार्पण करण्यात आले, ती सगळी कामगिरी मुख्यमंत्री देवेंद्र फडणवीस, उपमुख्यमंत्री अजित पवार आणि उपमुख्यमंत्री एकनाथ शिंदे यांच्या दूरदृष्टीपूर्ण नेतृत्वामुळे शक्य झाली आहे. त्यांच्या पाठबळामुळे मावळ मतदारसंघात विकासाची कामे आणखी वेगाने होणार आहेत. तळेगावच्या सर्वांगीण विकासासाठी आपण सदैव तत्पर राहू.’’