वाढीव मोबदला द्या, अन्यथा टोल बंद

तळेगाव दाभाडे, ता. ३ : ‘‘द्रुतगती मार्गासाठी शेतकऱ्यांच्या जमिनी संपादित करून २७ वर्षे झाली. रस्ता झाला. वाहने धावू लागली. टोल वसुलीही सुरू झाली. मात्र, शेतकऱ्यांना जमिनीचा वाढीव मोबदला मिळालेला नाही. येत्या पंधरा दिवसांत शासनाने वाढीव मोबदला न दिल्यास तहसील कार्यालयावर मोर्चा काढू. तसेच अन्य सुविधांसाठी टोल बंद करून आयआरबी कंपनीसमोर तीव्र आंदोलन करू,’’ असा इशारा पुणे-मुंबई द्रुतगती मार्ग शेतकरी कृती समितीचे अध्यक्ष भरत मोरे यांनी दिला.

द्रुतगती महामार्गासाठी जमीन गेलेल्या १२ गावांतील बाधित शेतकऱ्यांचा मेळावा कामशेत येथील गणेश मंगल कार्यालयात रविवारी पार पडला. यावेळी पुणे अॅड. गौरव पुतनीस, विलास भटेवरा, गुलाब तिकोने, विजय तिकोने, नरहरी केदारी, सुनील भटेवरा, नाना धामणकर, जयसिंग ठाकूर, सोनू खाडे, गणपत केदारी, काळूराम केदारी, अभिमन्यू शिंदे, भाऊ पिंपळे, गणेश वाघवले, प्रल्हाद धामणकर, राजू पिंपळे, शंकर घुले यांच्यासह १२ गावांतील बाधित शेतकरी मोठ्या संखेने उपस्थित होते.
सध्याच्या दराप्रमाणे वाढीव मोबदला मिळावा, बाधित शेतकऱ्यांच्या मुलांना नोकऱ्या मिळाव्यात, सेवा रस्ता करावा, जमीन देणाऱ्यांना टोल फ्री पास मिळावेत, डंपिंग क्षेत्रावरील सात-बारा उताऱ्यावर नावे दाखल करावीत, अशा विविध मागण्या यावेळी करण्यात आल्या.

शेतकऱ्यांच्या चांगल्या जमिनी त्यावेळी कवडीमोल दरात रस्त्यासाठी घेतल्या. ना शेतकऱ्यांना सुविधा दिल्या, ना वाढीव रक्कम सध्याच्या दराप्रमाणे वाढीव रक्कम मिळावी, आयआरबी कंपनीच्या सीएसआर फंड संपादित केलेल्या गावांना मिळावा.
- भरत मोरे, अध्यक्ष, कृती समिती

संपादित झालेल्या क्षेत्रापैकी रस्ता बाधित क्षेत्र सात-बारा दप्तरी दिसत आहे. पण, डंपिंग क्षेत्र हे सात-बारा उताऱ्यावर दिसत नाही. उर्वरित क्षेत्र कुठे गायब झाले. याचा शोध सरकारने लावावा.
- भाऊ पिंपळे, बाधित शेतकरी

द्रुतगती मार्गासाठी जमिनी दिल्या. काही जमिनीचा अर्धा भाग आत, तर काही भाग बाहेर गेला आहे. पण, बाहेरच्या जमिनीकडे जाण्यासाठी रस्ता नाही. त्यामुळे शेतीची अवजारे नेता येत नाही. हा रस्ता खुला करावा.
- बाजीराव लगड, बाधित शेतकरी

TDB25B03487