मतदार यादीवरील हरकतीसाठी १७ ऑक्टोबरपर्यंत मुदत

तळेगाव दाभाडे, ता. १५ : नगरपरिषद आणि नगरपंचायत निवडणुकांसाठी जाहीर झालेल्या प्रारूप मतदार यादीवरील हरकती व सूचना दाखल करण्याची अंतिम तारीख १७ ऑक्टोबर २०२५ पर्यंत वाढविण्यात आली आहे. यापूर्वी ही मुदत १३ ऑक्टोबरपर्यंत होती, अशी माहिती मुख्याधिकारी विजयकुमार सरनाईक आणि उपमुख्याधिकारी ममता राठोड यांनी दिली.
प्रभागनिहाय मतदार यादी आठ ऑक्टोबर रोजी प्रसिद्ध झाली होती. आता अंतिम मतदार यादी २८ ऑक्टोबरऐवजी ३१ ऑक्टोबर २०२५ रोजी प्रसिद्ध केली जाणार आहे. ही सुधारित माहिती महाराष्ट्र राज्य निवडणूक आयोगाकडून नगरपरिषदेला मिळाल्याचेही प्रशासनाने सांगितले.