तळेगावात मतदानासाठी प्रशासकीय तयारी

तळेगाव दाभाडे ता. २४ : नगर परिषद निवडणुकीत मतदान प्रक्रिया सुरळीत होण्यासाठी मतदान केंद्र अधिकारी आणि कर्मचाऱ्यांचे द्वितीय प्रशिक्षण सोमवारी (ता.२४) सकाळ व दुपार अशा दोन सत्रांत घेण्यात आले. यात ४२५ अधिकारी, कर्मचारी सहभागी झाले.

निवडणूक निर्णय अधिकारी अर्चना तांबे यांच्या मार्गदर्शनाखाली सहाय्यक निवडणूक निर्णय अधिकारी गिरीश दापकेकर व उपमुख्याधिकारी ममता राठोड यांनी मतदान केंद्रावरील कार्यपद्धती, जबाबदाऱ्या आणि निवडणूक प्रक्रिया याबाबत मार्गदर्शन केले. अधिकारी व कर्मचाऱ्यांना प्रत्यक्ष मतदान यंत्रांची हाताळणी करण्यासाठी प्रशिक्षण देण्यात आले. मतदान प्रक्रियेतील तांत्रिक बाबी, मशिनची सेटिंग, बिघाड निवारण इत्यादींचे प्रात्यक्षिक नायब तहसीलदार अविनाश पिसाळ यांनी दाखवून दिले.
यामुळे दोन डिसेंबर रोजी होणाऱ्या मतदानासाठी यंत्रणा सज्ज करण्याची प्रक्रिया अधिक कार्यक्षमपणे राबवता येणार असल्याचे अधिकाऱ्यांनी सांगितले.