निकालाआधीच मिरवणुकीची तयारी

तळेगाव दाभाडे, ता. १६ ः मावळ तालुक्यातील स्थानिक स्वराज्य संस्थांच्या निवडणुकांचे निकाल येत्या २१ तारखेला लागणार आहेत, मात्र अनेकांनी त्याआधीच मिरवणुकीची तयारी सुरू केली आहे. विजयाचा जल्लोष करण्यासाठी बॅण्ड-ढोल-लेझीम पथके बुक करण्यात आली आहेत. कोण जिंकणार, कोण हरणार यावरून अनेकांनी लाखो रुपयांच्या पैजा लावल्या आहेत.
लोणावळा नगरपरिषद, तळेगाव दाभाडे नगरपरिषद तसेच काही प्रभाग वगळता वडगाव नगरपंचायतीची निवडणुका शांततेत पार पडली. तळेगाव दाभाडे वगळता बहुतांश ठिकाणी राष्ट्रवादी काँग्रेस आणि भाजप यांच्यात थेट लढत रंगली. आता निकालाकडे सर्वांचे लक्ष लागले आहे.
प्रत्येक पक्षाने विजयाचा दावा केला आहे. निकालाआधीच या तिन्ही शहरांत दोन्ही पक्षांच्या उमेदवारांनी मिरवणुकीची तयारी सुरू झाली आहे. तळेगाव दाभाडे नगरपरिषद निवडणुकीत राष्ट्रवादी काँग्रेस व भाजप यांची महायुती झाली होती. महायुतीने नगराध्यक्षपदासाठी संतोष दाभाडे यांना उमेदवारी दिली. किशोर भेगडे व रंजना भोसले या अपक्ष उमेदवारांसह तिघे रिंगणात आहेत. एकूण २८ पैकी १८ जागा बिनविरोध झाल्या. एक जागा न्यायालयीन प्रकरणामुळे रखडली आहे. उर्वरित पाच जागांसाठी मतदान होणार आहे.
वडगावमध्ये एकूण १७ जागांसाठी भाजप आणि राष्ट्रवादी काँग्रेस यांच्यात थेट लढत झाली. नगराध्यक्षपदासाठी राष्ट्रवादीकडून अबोली ढोरे, तर भाजपकडून मृणाल म्हाळसकर व दोन अपक्ष रिंगणात होते. ढोरे व म्हाळसकर यांच्यातच खरी चुरस पाहायला मिळाली.
लोणावळ्यात एकूण २७ जागांपैकी तीन जागा बिनविरोध झाल्या. २२ प्रभागांमध्ये निवडणूक झाली. दोन प्रभागांतील प्रत्येकी एका जागेसाठी निवडणूक झाली. नगराध्यक्षपदासाठी राष्ट्रवादी काँग्रेसकडून राजेंद्र सोनवणे, शिवसेना-आरपीआय युतीकडून सूर्यकांत वाघमारे, तर भाजपकडून गिरीश कांबळे रिंगणात होते. तिन्ही पक्षांनी ताकद पणाला लावली होती. तिन्ही पक्षांनी नगराध्यक्षपद पटकावण्याचा दावा केला आहे.
वडगाव आणि लोणावळा येथे नगराध्यक्ष आमचाच होणार असा दावा दोन्ही प्रमुख पक्षांनी केला आहे. तळेगाव दाभाडे नगरपरिषदेत महायुतीचाच नगराध्यक्ष होणार असल्याचा विश्वास महायुतीच्या नेत्यांनी व्यक्त केला आहे, तर अपक्ष उमेदवार किशोर भेगडे यांनीही विजय आपलाच असल्याचा दावा केला आहे.
या पार्श्वभूमीवर निकालाआधीच शहरांमध्ये उत्सुकता शिगेला पोहोचली आहे.
-----