तळेगावच्या मालमत्ताकराची माहिती संकेतस्थळावर

तळेगाव दाभाडे, ता. २८ : तळेगाव दाभाडे नगरपरिषदेच्या प्रशासनाने शहरातील मिळकत धारकांसाठी महत्त्वाची सुविधा उपलब्ध करून दिली आहे. mahaulb.in या महाराष्ट्र शासनाच्या नागरी सेवा संकेतस्थळावर मालमत्ताकराची संपूर्ण माहिती भरण्यात आली आहे. यामुळे आता नागरिकांना मालमत्ताकर भरण्यासाठी नगरपरिषदेच्या कार्यालयात चकरा मारण्याची किंवा रांगेत उभे राहण्याची गरज उरलेली नाही. नागरिक आता घरबसल्या भ्रमणध्वनी किंवा संगणकाच्या माध्यमातून मिळकतकर भरणा करू शकतील. यामुळे वेळेची बचत, पारदर्शकता आणि व्यवहारातील अचूकता सुनिश्चित होणार आहे.