उघड्यावर कचरा टाकल्यास तळेगावमध्ये कारवाई होणार

तळेगाव दाभाडे, ता. ६ : तळेगाव दाभाडे शहर स्वच्छ व सुंदर ठेवण्याच्या उद्देशाने नगर परिषद प्रशासनाने उघड्यावर कचरा टाकणाऱ्या नागरिकांवर दंडात्मक कारवाईचा बडगा उगारला आहे. शुक्रवारी नगराध्यक्ष संतोष दाभाडे व मुख्याधिकारी गिरीश दापकेकर यांच्या मार्गदर्शनाखाली तसेच विभाग प्रमुख अभिषेक शिंदे यांच्या सूचनेनुसार कारवाई सुरू करण्यात आली. नागरिकांनी सार्वजनिक ठिकाणी किंवा रस्त्यावर कचरा टाकू नये, तसेच शहर स्वच्छ ठेवण्यासाठी नगर परिषदेला सहकार्य करावे, असे आवाहन यावेळी करण्यात आले. यासोबतच स्वच्छतेबाबत नागरिकांमध्ये जनजागृतीही करण्यात येत आहे.
या मोहिमेत स्वच्छता निरीक्षक प्रशांत शिवणे, सुनील काळकुटे, दत्तात्रय ढवळे, शहर समन्वयक शुभम चौकटे तसेच स्वच्छता पर्यवेक्षक राहुल आगळे यांनी सहभाग घेतला.
-----