पवना धरणातून गाळ काढणे सुरू

तळेगाव दाभाडे, ता. २६ : पवना धरणातून गाळ काढण्याच्या कामाला रविवारपासून आरंभ करण्यात आला. यावेळी विधिवत पूजन करून मावळ लोकसभेचे खासदार श्रीरंग बारणे यांच्या हस्ते या उपक्रमाची सुरुवात झाली. गेल्या दहा वर्षांपासून कोणतीही शासकीय आर्थिक मदत न घेता, केवळ लोकसहभागाच्या जोरावर हे काम सुरू आहे. यामुळे धरणातील पाणीसाठा वाढण्यास मदत होत असून, परिसरातील जलसंधारणाला बळ मिळत आहे. यंदाही पवना धरणातील जास्तीत जास्त गाळ काढून पाणीसाठ्यात वाढ करण्याचा उद्देश ठेवण्यात आला आहे. या प्रसंगी शिवसेनेचे पदाधिकारी, कार्यकर्ते आणि ग्रामस्थ मोठ्या संख्येने उपस्थित होते.