संत संताजी जगनाडे महाराज समाधीस्थळ --------------------- विकास आराखड्यासाठी ६६ कोटींचा निधी मंजूर

तळेगाव स्टेशन, ता. २ : मावळ तालुक्यातील सुदुंबरे येथील श्री संत संताजी जगनाडे महाराज यांच्या समाधीस्थळ विकास आराखड्यासाठी सुमारे ६६ कोटी ११ लाख रुपयांच्या निधीस राज्य शासनाकडून प्रशासकीय मान्यता मिळाली आहे.
संताजी महाराज जगनाडे हे संत तुकाराम महाराज यांचे सांगाती, टाळकरी व लेखनिक होते. त्यांचे समाधी मंदिर सुदुंबरे येथे आहे. जगद्गुरु संत तुकाराम महाराजांची गाथा पाण्यात बुडविल्यानंतर संत जगनाडे महाराजांनी गाथा पुन्हा संकलित करून, पुनर्लेखन केले. स्वतःही अभंग लिहून समाजप्रबोधनाचे महान कार्य केले. त्यामुळे संत जगनाडे महाराजांच्या समाधी स्थळास विशेष महत्त्व आहे.
श्री क्षेत्र देहू, आळंदी, भंडारा डोंगर विकास आराखड्यांतर्गत सुदुंबरे येथील जगनाडे महाराज यांच्या समाधी स्थळाचा विकास आणि परिसर सौंदर्यीकरण करण्याच्या विकास आराखड्यास २३ नोव्हेंबर २०२३ रोजी मुख्यमंत्री एकनाथ शिंदे यांच्या अध्यक्षतेखाली पार पडलेल्या शिखर समितीच्या बैठकीत मान्यता देण्यात आली. सभा मंडप बांधणे, प्रशासकीय इमारत बांधणे, महाराजांचा एकवीस फुटी कांस्य पुतळा आणि दगडी आच्छादन असलेले संग्रहालय, सुसज्ज भक्तनिवास, महाद्वार, घाट बांधकाम, अंतर्गत रस्ते, बाग आदी आवश्यक सुविधा निर्माण करण्यात येणार आहेत. ही कामे करताना ऐतिहासिक वास्तूंची मूळ शैलीदेखील जपण्यात येणार आहे.

संत जगनाडे महाराज समाधी स्थळ विकास आराखड्यासाठी निधी उपलब्ध केल्याबद्दल राज्य सरकारचे आभार मानतो. जगनाडे महाराजांच्या समाधी स्थळाचा विकास हा आराखड्यानुसार भव्य व सुंदर होईल. भावी पिढीपर्यंत संतांचा महिमा आणि सांप्रदायिक वारसा पोचविण्याचा प्रयत्न याद्वारे करण्यात येईल.
- आमदार सुनील शेळके.

फोटोः 04722