तळेगावात वन्यजीव पर्यावरण जनजागृती चित्रकला स्पर्धा

तळेगाव स्टेशन, ता. ३१ : पुणे वनविभाग, तळेगाव दाभाडे नगरपरिषद, वन्यजीव रक्षक मावळ संस्था, आरएमके उद्योग समूह आणि रोटरी क्लब ऑफ गोल्डन तळेगाव दाभाडे यांच्या संयुक्त विद्यमाने तळेगाव दाभाडे येथे येत्या १० ऑगस्ट रोजी वन्यजीव पर्यावरण जनजागृती चित्रकला स्पर्धेचे आयोजन करण्यात आले आहे.
स्पर्धा सकाळी ९ ते दुपारी १२ दरम्यान सुशीला मंगल कार्यालयात होणार आहे. सहभागी होण्यासाठी इच्छुकांनी विनाशुल्क ऑनलाइन नोंदणी करावी. स्पर्धेनंतर विजेत्यांना सन्मान चिन्हासह रोख बक्षीसे आणि सहभागी स्पर्धकांना प्रमाणपत्र दिले जाईल. पहिल्या गटात बालवाडी ते दुसरीसाठी चित्र रंगवा स्पर्धा, दुसऱ्या गटात तिसरी ते सातवीसाठी माझा आवडता वन्यप्राणी, तिसऱ्या गटात आठवी ते बारावीच्या विद्यार्थ्यांसाठी माझे पर्यावरण माझी जबाबदारी, चौथ्या आणि खुल्या गटात मानव आणि वन्यजीवांतील संघर्ष या विषयावर चित्र काढता येणार आहे. स्पर्धेसाठी कागद आयोजकांतर्फे देण्यात येणार असून स्पर्धकांनी रंग आणि साहित्य स्वतःहून आणायचे आहे. रक्तदान आणि मोफत नेत्र तपासणी शिबिराचे देखील आयोजन करण्यात आले आहे. याप्रसंगी वन्यजीव संवर्धनासाठी लढणाऱ्यांचा सन्मान करण्यात येणार आहे.