स्वामी विवेकानंद स्कूलमध्ये शिक्षक दिन उत्साहात

तळेगाव स्टेशन, ता. ७ : डोळसनाथ महाराज शिक्षण प्रसारक मंडळ संचलित स्वामी विवेकानंद इंग्लिश स्कूलमध्ये डॉ. सर्वपल्ली राधाकृष्णन यांची जयंती शिक्षक दिन म्हणून उत्साहात करण्यात आली.
संस्थेचे सचिव मिलिंद शेलार, शाळेच्या मुख्याध्यापिका रेणू शर्मा, पर्यवेक्षक सिद्धेश सोनवणे यांनी दीपप्रज्वलन आणि डॉ. सर्वपल्ली राधाकृष्णन यांच्या प्रतिमेचे पूजन करून अभिवादन केले. विद्यार्थ्यांनी सर्व शिक्षक आणि शिक्षकेतर कर्मचाऱ्यांचा पुष्पगुच्छ देऊन सत्कार केला. दहावीच्या विद्यार्थ्यांनी स्वागतगीत आणि नृत्य सादरीकरण केले. विवेक ढेंगळे या विद्यार्थ्याने मनोगत व्यक्त केले. विद्यार्थ्यांच्या जीवनात ज्ञानाचा प्रकाश पाडण्याचे व जीवन परिपूर्ण करण्याचे कार्य हे शिक्षकच करतात. त्यांनी विद्यार्थ्यांच्या भवितव्यासाठी सदैव तत्पर राहावे असे आवाहन शेलार यांनी केले. दहावीच्या विद्यार्थ्यांनी सर्व शिक्षकांची भूमिका निभावत एक दिवस अध्यापन केले. तसेच शिक्षकांसाठी विविध खेळांचे आयोजन केले होते. ऋतुजा सोनटक्के या विद्यार्थिनीने सूत्रसंचालन केले. सिद्धांत चौगुले याने आभार मानले. संस्थेचे संस्थापक अध्यक्ष संतोष खांडगे, उपाध्यक्ष दादासाहेब उऱ्हे, शालेय समिती अध्यक्षा रजनीगंधा खांडगे, कार्याध्यक्ष बाळासाहेब शिंदे यांनी कार्यक्रमास शुभेच्छा दिल्या.