मावळातील आदिवासी भागांतील पाड्यांवर मतदान जनजागृती

वडगाव मावळ, ता.१७ : मावळ विधानसभा मतदारसंघातील निवडणूक कर्मचारी पथकाने (स्वीप टीम) तालुक्यातील आदिवासी भागातील गावांमध्ये जाऊन मतदारांमध्ये मतदान करण्याबाबत जनजागृती केली. तसेच कुणेनामा प्राथमिक शाळेतील विद्यार्थ्यांकडून पालकांना मतदान करण्याविषयी पथकाने संकल्प पत्रे भरून घेतली.
निवडणूक निर्णय अधिकारी सुरेंद्र नवले, सहाय्यक निवडणूक निर्णय अधिकारी विक्रम देशमुख, गट विकास अधिकारी कुलदीप प्रधान यांच्या मार्गदर्शनाखाली तालुक्यातील कुणेनामा येथील प्राथमिक शाळेला भेट देऊन पथकाने मतदान जनजागृतीबाबत संपर्क साधला. ही तालुक्यातील पहिली ते दहावीपर्यंतची एकमेव शाळा आहे. या शाळेमध्ये रांगोळी, वक्तृत्व, चित्रकला स्पर्धा आदी स्पर्धा घेऊन मतदान करण्याबाबत आवाहन करण्यात आले. उधेवाडी येथे भेट देऊन मतदार चिठ्ठ्यांचे वाटप करून मतदान करण्याबाबत आवाहन करण्यात आले. पांगळोली येथील ठाकर वस्ती व कुणेनामा येथील केंद्राला भेट देऊन मतदान जनजागृती करण्यात आली. गट शिक्षणाधिकारी सुदाम वाळुंज, सहाय्यक गटविकास अधिकारी सेवक थोरात, संजय खेडकर, झोनल अधिकारी चांदोरकर आदी सहभागी झाले होते.