गो-दान पसायदान दिंडीतर्फे विविध सामाजिक उपक्रम

वडगाव मावळ, ता. २५ : श्री क्षेत्र आळंदी येथील गो-दान पसायदान विश्वजागृती धर्मदाय संस्थेद्वारा संचलित पसायदान सहजीवन दिंडीचे श्रीक्षेत्र आळंदी ते श्रीक्षेत्र पंढरपूर पायी वारीचे हे तिसरे वर्ष आहे. या दिंडीमार्फत विविध सामाजिक उपक्रम राबविले जातात. ही दिंडी संत श्रेष्ठ ज्ञानेश्वर महाराजांच्या आषाढी वारी पालखी सोहळ्याच्या पुढे एक दिवस आधी वारी वाटेवर मार्गक्रमण करत असते.
ग्रंथराज ज्ञानेश्वरीचे अभ्यासक रामदास जैद व वडगाव मावळ येथील तीर्थक्षेत्र श्री पोटोबा महाराज देवस्थानचे विश्वस्त भास्करराव म्हाळसकर यांच्या मार्गदर्शनाखाली संस्थेची आध्यात्मिक व सामाजिक वाटचाल सुरू आहे. माउलींच्या पसायदानाचा जगभर प्रचार व प्रसार व्हावा, हा संस्थेचा मुख्य उद्देश असून त्याचाच एक भाग म्हणून संस्था पसायदान सहजीवन दिंडीच्या माध्यमातून आषाढी वारी वाटेवर सहजीवन वारी, एकात्मता वारी, निर्मळ वारी व हरित वारी हे उपक्रम गेल्या दोन वर्षांपासून राबवत आहे. ठिकठिकाणी रक्तदान शिबिरांचे आयोजन, गो-दान सोहळे, वृक्षारोपण व मराठी शाळा तसेच शासकीय कार्यालये जिथे वारी काळात वारकरी दिंड्यांना दुपारचा विसावा तथा रात्रीच्या मुक्कामाची सुविधा उपलब्ध करून दिली जाते.
वाल्हे येथील वाल्मिकी विद्यालय व ज्युनियर कॉलेज येथे पसायदान दिंडीला गेली दोन वर्षे रात्रीच्या मुक्कामाची सोय उपलब्ध करून दिली जात आहे. संस्थेच्या निर्मळ वारी या उपक्रमाच्या माध्यमातून संस्थेकडून वाल्हे येथील वाल्मिकी विद्यालय व ज्युनियर कॉलेजचे प्राचार्य निगडे यांच्याकडे ५१ हजार रुपयांचा धनादेश सुपूर्द करण्यात आला. या वेळी गो-दान पसायदान विश्वजागृती धर्मदाय संस्थेचे संस्थापक अध्यक्ष मुबारक शेख, कोषाध्यक्ष रामदास रानवडे, दत्तात्रय साबळे महाराज, हनुमंत पवार, तारामण कलाटे, उज्ज्वला साबळे, कविता दगडे, सुनील ढोबळे आणि वारकरी भाविक उपस्थित होते.