वडगाव येथे शुक्रवारी सरपंचपदांसाठी आरक्षण सोडत

वडगाव मावळ, ता. १० : आगामी पाच वर्षांसाठी मावळ तालुक्यातील ९३ ग्रामपंचायतींच्या सरपंचपदाची आरक्षण सोडत शुक्रवारी (ता. ११) दुपारी १२ वाजता वडगाव येथील भेगडे लॉन्स मंगल कार्यालयात काढण्यात येणार असल्याची माहिती मावळचे तहसीलदार विक्रम देशमुख व नायब तहसीलदार गणेश तळेकर यांनी दिली.
मावळ तालुक्यात एकूण १०३ ग्रामपंचायती असून त्यांच्या सरपंचपदासाठी १३ जून २०२५ ते १२ जून २०३० या कालावधीसाठी आरक्षण सोडत काढण्यात येणार आहे. या पूर्वी गेल्या २३ एप्रिल रोजी सरपंचपदाची सोडत काढण्यात आली होती. परंतु, न्यायालयाच्या आदेशानुसार पुन्हा नव्याने सोडत काढण्यात येत आहे. त्यात प्रवर्गनिहाय जागा पूर्वीप्रमाणेच राहणार असून काही गावांचे आरक्षण मात्र बदलण्याची शक्यता आहे. मावळ तालुक्यातील १०३ ग्रामपंचायतींपैकी आदिवासी क्षेत्रातील दहा ग्रामपंचायती अनुसूचित जमातीसाठी कायमस्वरूपी राखीव असून, त्यांचा या सोडतीमध्ये समावेश नाही. उर्वरित ९३ ग्रामपंचायतीपैकी नऊ ग्रामपंचायती अनुसूचित जातीसाठी, सहा ग्रामपंचायती अनुसूचित जमातीसाठी, २५ ग्रामपंचायती नागरिकांचा मागास प्रवर्गासाठी (ओबीसी) तर ५३ ग्रामपंचायती सर्वसाधारण वर्गासाठी लहान मुलांच्या हस्ते चिठ्ठ्या टाकून आरक्षित केल्या जाणार आहेत. सर्वसाधारण ५३ ग्रामपंचायतींमधून महिला व पुरुषांसाठी आरक्षण काढले जाणार आहे. सर्व ग्रामपंचायतींमधील सर्व राजकीय पक्षाचे पदाधिकारी व ग्रामस्थांनी सोडतीसाठी उपस्थितीत राहावे, असे आवाहन तहसीलदार विक्रम देशमुख व नायब तहसीलदार गणेश तळेकर यांनी केले आहे.
---