‘मावळातील प्रभाग रचना चुकीच्या पद्धतीने’

वडगाव मावळ, ता. १७ : मावळ तालुक्यातील जिल्हा परिषद गट व पंचायत समिती गणांची केलेली प्रभाग रचना ही निवडणूक आयोगाने घालून दिलेल्या नियमाला डावलून अतिशय चुकीच्या पद्धतीने व मनमानी पद्धतीने करण्यात आली असल्याचा आरोप राष्ट्रवादी काँग्रेस शरदचंद्र पवार पक्षाचे तालुका अध्यक्ष दत्तात्रेय पडवळ यांनी केली आहे. या प्रभाग रचनेवर पक्षाच्या वतीने हरकत दाखल करण्यात येणार असल्याची माहितीही त्यांनी दिली. मावळ तालुक्यातील जिल्हा परिषदेच्या पाच व पंचायत समितीच्या दहा गणांची प्रारूप प्रभाग रचना सोमवारी जिल्हाधिकारी जितेंद्र डुडी यांनी जाहीर केली. या प्रभाग रचनेबाबत पडवळ यांनी निवेदन प्रसिद्धीला दिले. त्यात म्हटले आहे की, आत्तापर्यंतच्या अशी विचित्र रचना करण्यात झाली नव्हती. कशाचाही ताळमेळ नाही. रचना आटोपशीर करावी. वडेश्वर पंचायत समिती गण ४० किलोमीटर लांबीचा आहे. टाकवे गट ४० ते ५० किलोमीटर लांबीचा केला आहे.