मोरया प्रतिष्ठानच्या वतीने सात हजार झाडांचे वाटप

वडगाव मावळ, ता. २१ : उपमुख्यमंत्री अजित पवार यांच्या वाढदिवसानिमित्त येथील मोरया प्रतिष्ठानच्या वतीने वृक्ष संवर्धनासाठी ‘मागेल त्याला झाड’ उपक्रमांतर्गत वडगाव शहरातील नागरिकांना सात हजार झाडांचे मोफत वाटप करण्यात आले.
उपमुख्यमंत्री अजित पवार यांच्या वाढदिवसाचे औचित्य साधून आमदार सुनील शेळके यांच्या मार्गदर्शनाखाली मोरया प्रतिष्ठानच्या माध्यमातून अध्यक्षा अबोली ढोरे यांच्या स्वखर्चातून हा उपक्रम राबविण्यात आला. वडगाव कातवीतील रहिवाशांसाठी ‘मागेल त्याला, मोफत झाड’ या उपक्रमांतर्गत सुमारे सात हजार फळ, फूल व सावली देणाऱ्या झाडांचे वाटप करण्यात आले. राष्ट्रवादी काँग्रेसचे तालुका अध्यक्ष गणेश खांडगे, काँग्रेसचे माजी तालुकाध्यक्ष बाळासाहेब ढोरे, राष्ट्रवादी महिला तालुकाध्यक्षा सुवर्णा राऊत, ज्येष्ठ नेते मंगेश ढोरे, माजी नगराध्यक्ष मयूर ढोरे, प्रतिष्ठान अध्यक्षा अबोली ढोरे यांच्या उपस्थितीत मोफत झाडे वाटप शुभारंभ झाला.
आमदार सुनील शेळके यांनी वृक्षसंवर्धन वाढीसाठी केलेल्या संकल्पास प्रतिसाद देऊन तसेच विधानसभेच्या निवडणुकीत वडगाव शहरातून आमदार शेळके यांना मिळालेल्या पाच हजार मताधिक्याहून अधिक सुमारे सात हजार झाडांचे मोफत वाटप यावेळी करण्यात आले. वडगाव कातवीतील नागरिकांनी आपापल्या परिसरात झाडे लावावीत यासाठी मोरया प्रतिष्ठानच्या वतीने शहरात नागरिकांना आंबा, नारळ, फणस, चिकू, जांब, पेरू, जांभूळ, सोनचाफा, बेल, कदंब, कडूनिंब, आवळा, गुलाब, मोगरा, रातराणी, इत्यादी प्रकारची पाच फूट उंचीची झाडे विनामूल्य वाटप करण्यात आली.
‘‘वृक्षसंवर्धन वाढीसाठी झाडे लावणे काळाची गरज असल्याने गेल्या अनेक वर्षांपासून मागेल त्याला मोफत झाड हा उपक्रम मोरया प्रतिष्ठान माध्यमातून राबविण्यात येत असतो,’’ अशी माहिती प्रतिष्ठान अध्यक्षा अबोली ढोरे यांनी दिली.
राष्ट्रवादी काँग्रेसचे वरिष्ठ उपाध्यक्ष पंढरीनाथ ढोरे, माजी सरपंच बापूसाहेब वाघवले, अर्चना भोकरे, काँग्रेस शहराध्यक्ष बाळासाहेब चव्हाण, अर्जुन ढोरे, श्रीधर ढोरे, चंदुकाका ढोरे, सतीश ढोरे, माजी नगरसेविका पूनम जाधव, माजी शहराध्यक्ष अतुल वायकर, प्रतिष्ठान उपाध्यक्षा चेतना ढोरे, गणेश जाधव आदींसह मोरया प्रतिष्ठान व मोरया ढोल पथक सदस्य, वडगाव नगरपंचायत कर्मचारी आणि नागरिक मोठ्या संख्येने उपस्थित होते.