तरुणीला आत्महत्येस प्रवृत्त; तिघांवर गुन्हा; दोघे अटक

वडगाव मावळ, ता. २ : कॅफेमध्ये सोबत काढलेले फोटो व्हायरल करण्याची धमकी देत येथील एका तरुणीचा मानसिक छळ करून तिला आत्महत्येस प्रवृत्त केल्याप्रकरणी वडगाव पोलिसांनी तीन जणांविरुद्ध गुन्हा दाखल केला असून, त्यातील दोघांना अटक केली आहे.
रणजित राजेंद्र देशमुख (वय २६), प्राण ज्ञानेश्वर येवले व अभिषेक अनिल ढोरे (सर्व रा. वडगाव मावळ) अशी गुन्हा दाखल झालेल्या आरोपींची नावे असून, पोलिसांनी यातील रणजित देशमुख व अभिषेक ढोरे यांना अटक केली आहे. न्यायालयाने देशमुख याला पाच दिवसांची पोलिस कोठडी दिली आहे. आत्महत्या केलेल्या मुलीच्या वडिलांनी याप्रकरणी वडगाव पोलिस ठाण्यात फिर्याद दिली आहे.
वडगावचे पोलिस निरीक्षक कुमार कदम यांनी दिलेल्या माहितीनुसार, रणजित देशमुख याने पीडित मुलीला कॅफेमध्ये सोबत काढलेले फोटो व्हायरल करण्याची धमकी देऊन वेगवेगळ्या मोबाईलवरून तिला कॉल करून तिचा वेळोवेळी मानसिक छळ केला. तिचे आई वडीलांना मारण्याची व तिचे लग्न मोडण्याची धमकी दिली. तसेच त्याचे मित्र प्राण येवले व अभिषेक ढोरे यांनी तिला रणजित देशमुख याच्यासोबत मैत्री केली नाही तरी तुझी बदनामी करू अशी धमकी दिली होती. या छळाला कंटाळून मुलीने राहत्या घरी गळफास घेऊन आत्महत्या केली. पोलिसांनी तिघांवर गुन्हा दाखल केला आहे. सहाय्यक पोलिस निरीक्षक शीतलकुमार डोईजड पुढील तपास करीत आहेत.