शास्ती अभय योजनेला ३० पर्यंत मुदतवाढ

वडगाव मावळ, ता. १८ : वडगाव नगरपंचायतीने मालमत्ता करावरील शास्ती (दंडात्मक व्याज) माफीसाठी राबविण्यात येत असलेल्या अभय योजनेला येत्या ३० ऑगस्टपर्यंत मुदतवाढ दिली आहे. वडगाव नगरपंचायत हद्दीतील ज्या थकबाकीदार मिळकत धारकांची शास्तीची थकबाकी आहे, अशा मिळकतधारकांनी मुदतीत अर्ज करून या योजनेचा लाभ घ्यावा, असे आवाहन मुख्याधिकारी डॉ. प्रवीण निकम यांनी केले आहे.
मुख्याधिकारी डॉ. निकम यांनी सांगितले, अभय योजनेसाठी यापूर्वी १५ ऑगस्टपर्यंत मुदत देण्यात आली होती. मात्र, आता ती ३० ऑगस्टपर्यंत वाढविण्यात आली आहे. ज्या थकबाकीदार मिळकतधारकांची शास्तीची थकबाकी आहे, अशा मिळकतधारकांनी मुदतीत मालमत्ता करावरील शास्ती अंशतः/पूर्णतः माफ करण्यासाठी शास्ती वगळून मिळकतकराची पूर्ण रक्कम भरून विहित नमुन्यात अर्ज नगरपंचायत कार्यालयाकडे सादर करावा. अभय योजना एकदाच (केवळ २०२५-२६ या आर्थिक वर्षाकरताच) लागू आहे. अभय योजना थकीत मालमत्ता कर वसुलीसाठी प्रोत्साहनपर आहे. जे मिळकतधारक अभय योजनेचा लाभ घेऊ इच्छितात अशा मालमत्ताधारकांनी सवलत मागणीकरता परिपूर्ण प्रस्ताव नगरपंचायत कार्यालयाकडे सादर करावा. अर्जाचा विहित नमुना नगरपंचायत कार्यालयात तसेच www.npvadgaon.in या वेबसाइटवर उपलब्ध आहे. त्या नमुन्यातच अर्ज सादर करावा. प्रस्ताव सादर करताना सोबत आधारकार्ड छायाप्रत, २०२५-२६च्या मालमत्ता कराच्या मागणी बिलाची छायाप्रत व शास्ती वगळून संपूर्ण कराची रक्कम भरलेल्या पावतीची छायाप्रत जोडणे आवश्यक आहे. शासनाच्या या योजनेचा जास्तीत जास्त नागरिकांनी लाभ घ्यावा. कराचा भरणा करण्यासाठी ऑनलाइन सुविधाही उपलब्ध आहे. शास्तीची रक्कम वगळून उर्वरित कराची रक्कम ऑनलाइन पद्धतीने भरणा करावी.
---