जांभूळ फाटा येथे वारकऱ्यांसाठी आरोग्य शिबिराचे आयोजन

वडगाव मावळ, ता. १० : श्री संत ज्ञानेश्वर महाराज संजीवन समाधी सोहळ्यानिमित्त मावळ तालुका वारकरी संप्रदाय मंडळाच्या वतीने ११ ते १३ नोव्हेंबर दरम्यान जांभूळ फाटा येथे वारकऱ्यांसाठी आरोग्य शिबिराचे आयोजन करण्यात आले असल्याची माहिती मंडळाचे अध्यक्ष नंदकुमार भसे यांनी दिली.
मावळ तालुका संप्रदाय मंडळाच्या वतीने दरवर्षी कोकण व मावळ तालुक्यातील आळंदीला पायी जाणाऱ्या दिंड्यांचे स्वागत केले जाते. यावर्षी दिंड्यांच्या स्वागत सोहळ्याबरोबरच तीन दिवस आरोग्य शिबिराचे आयोजन करण्यात आले आहे. वारकऱ्यांना चहापाणी, अल्पोपहार व अन्नप्रसादही करण्यात येणार आहे. मंगळवारी पहाटे ६ वाजता प्रतिमा पूजन व दीपप्रज्वलनाने उपक्रमाची सुरुवात होईल. सकाळी ८ ते दुपारी १२ दरम्यान आंबी येथील डॉ. पुष्पलता डी. वाय. पाटील हॉस्पिटलच्या सौजन्याने आरोग्य शिबिर होईल. स्वामी निरंजनानंद सरस्वती, शंकर महाराज मराठे व रमेशसिंहजी व्यास यांच्या हस्ते शिबिराचे उद्‍घाटन होईल. मंडळाचे अध्यक्ष नंदकुमार भसे, संतोष महाराज कुंभार, शिवाजीराव पवार, सुभाष महाराज पडवळ, भरत येवले, शांताराम गायखे, बळवंत येवले, महादुबुवा नवघणे आदींनी संयोजन केले आहे.
---