भगवान बिरसा मुंडा यांना बेलज येथे अभिवादन

वडगाव मावळ, ता. १६ : विश्व हिंदू परिषद, बजरंग दल व अनुलोमच्या वतीने मावळ तालुक्यातील बेलज येथे भगवान बिरसा मुंडा यांची १५० वी जयंती उत्साहात साजरी करण्यात आली.
भगवान बिरसा मुंडा व आद्य क्रांतिकारक राघोजी भांगरे यांच्या प्रतिमेला स्थानिक आदिवासी बंधू भगिनींच्या उपस्थितीत पुष्पहार अर्पण करून अभिवादन करण्यात आले. विश्व हिंदू परिषदेचे जिल्हा मंत्री महेंद्र असवले यांनी भगवान बिरसा मुंडा यांच्या सामाजिक जीवनावर मनोगत व्यक्त केले. कार्यक्रमाचे संयोजक अनुलोम भाग जनसेवक प्रा. बाळासाहेब खांडभोर यांनी भगवान बिरसा मुंडा यांचे जीवन चरित्र व सामाजिक समरसता या विषयावर मार्गदर्शन केले.
यावेळी निखिल भांगरे, स्वप्नील भालेकर, दर्शन आगळमे आदी उपस्थित होते. रोहन वाजे यांनी प्रास्ताविक केले. सुखदेव महाराज गवारी यांनी आभार मानले.