टाकवेतील छाप्यात ३१ कोटींचे तंबाखूजन्य पदार्थ जप्त

वडगाव मावळ, ता. ३ : अन्न व औषध प्रशासनाच्या विशेष भरारी पथकाने गुरुवारी मावळ तालुक्यातील टाकवे बुद्रूक येथील सोएक्स इंडिया कंपनीत छापा टाकला. यात फ्लेवर हुक्क्यासाठी लागणाऱ्या तसेच कायद्याने बंदी असलेल्या तंबाखूजन्य पदार्थांचा ५ लाख ४८ हजार ४८८ किलो वजनाचा व ३१ कोटी ६७ लाख ३१ हजार रुपये किमतीचा साठा जप्त झाला. वडगाव पोलिसांनी याप्रकरणी कंपनीच्या संबंधितांसह पाच जणांवर गुन्हा दाखल केला असून एकाला अटक केली.
अनिल कुमार चौहान असे आरोपीचे नाव आहे. तो कंपनीत सहाय्यक व्यवस्थापक आहे. न्यायालयाने त्याला आठ तारखेपर्यंत पोलिस कोठडी दिली. कंपनीचे संचालक असिफ फाजलानी व फैजल फाजलानी यांच्यावर तसेच सोएक्स इंडिया (टाकवे बुद्रूक) व सोएक्स इंडिया (मुंबई ) या कंपन्यांवरही गुन्हा दाखल झाला. अन्न सुरक्षा अधिकारी अस्मिता जयंत टोणपे यांनी याप्रकरणी वडगाव पोलिस ठाण्यात फिर्याद दिली. पोलिस निरीक्षक अभिजित देशमुख यांनी दिलेल्या माहितीनुसार ३१ डिसेंबर रोजी नार्कोली (ठाणे) येथे दाखल झालेल्या एका गुन्ह्याच्या अनुषंगाने भंडाऱ्याचे सहाय्यक आयुक्त यदुराज दहातोंडे, सोलापूरचे अन्न सुरक्षा अधिकारी मंगेश लवटे व अन्य अधिकाऱ्यांचा समावेश असलेल्या विशेष भरारी पथकाने हा छापा टाकला.
-----