दिल्ली येथील आंदोलनात मावळातूनही सहभाग

वडगाव मावळ, ता. ८ : सेवानिवृत्तीधारकांच्या विविध मागण्यांकडे शासनाचे लक्ष वेधण्यासाठी ‘ईपीएस ९५’ राष्ट्रीय संघर्ष समितीच्या माध्यमातून दिल्ली येथे आंदोलन होणार आहे. यात मावळ तालुक्यातील संघटनेचे पदाधिकारीही सहभागी होणार आहेत. ही माहिती संघटनेचे तालुकाध्यक्ष दशरथ ढोरे, सचिव विजय राऊत यांनी दिली.
देशात ८१ लाख सेवानिवृत्तीधारक विविध मागण्यांसाठी गेली आठ वर्षे ‘ईपीएस ९५’ राष्ट्रीय संघर्ष समितीचे अध्यक्ष कमांडर अशोक राऊत व राष्ट्रीय महासचिव वीरेंद्रसिंग राजावत यांच्या नेतृत्वाखाली लढा देत आहेत. अनेकदा रस्त्यावर उतरून तालुका, जिल्हा व ईपीएफओ कार्यालयावर अनेक आंदोलने झाली आहेत. सुमारे २५ ते ३० वर्षे सेवा करून ‘ईपीएफओ’कडे जमा केलेली रक्कम असतानाही त्यांना फक्त प्रतिमहा १ हजार १७५ रुपये इतकी तुटपुंजी पेन्शन मिळत आहे. वैद्यकीय सुविधा पुरेशा मिळत नाहीत. सध्या दिल्ली येथे संसदीय अधिवेशन सुरू आहे. या पार्श्वभूमीवर मागण्यांकडे शासनाचे लक्ष वेधण्यासाठी संघटनेच्या वतीने जंतर मंतर येथे आंदोलन करण्यात येणार आहे.

सेवावित्तीधारकांच्या मागण्या
साडेसात हजार रुपये मासिक पेन्शन व महागाई भत्ता मिळावा
पती-पत्नीसाठी वैद्यकीय सुविधा द्यावी.
सुप्रीम कोर्टाच्या निर्णयानुसार हायर पेन्शनचा लाभ देण्यात यावा
वंचित राहिलेल्या पेन्शनरांना पाच हजार रुपये पेन्शन देण्यात यावी