आपल्या गुरूंविषयी सतत कृतज्ञ असावे ः शिवले

हिंजवडी, ता. १० : शाळेत शिकवणारा शिक्षकच केवळ गुरू नव्हे तर आपल्याला अंधारातून प्रकाशाकडे नेणारा, अज्ञानाकडून ज्ञानाकडे नेणारा, अवगुणांकडून सद् गुणांकडे नेणारा प्रत्येक जण गुरू असतो. तसेच आई-वडीलही देवाने दिलेली खूप अनमोल अशी भेट आहे, त्यांच्याविषयी सदैव कृतज्ञता असली पाहिजे, असे मत आदर्श शिक्षक, पिंपरी चिंचवड शिक्षण मंडळाचे माजी उपसभापती नाना शिवले यांनी नेरे-दत्तवाडी येथे व्यक्त केले.
नेरे-दत्तवाडी येथील तुळजाभवानी प्रतिष्ठानच्यावतीने गुरू पोर्णिमेनिमित्त आयोजित गुरु विषयावरील व्याख्यानमालेत मार्गदर्शन करताना ते बोलत होते. यावेळी प्रा. गौतम दळवी यांच्यासह मोठ्या संख्येने महिला, विद्यार्थी व इतर ग्रामस्थ उपस्थित होते. श्री तुळजाभवानी प्रतिष्ठानचे संस्थापक अध्यक्ष संदीप जाधव, माजी आदर्श सरपंच दीपाली जाधव आणि मंडळाच्या सदस्यांनी या कार्यक्रमाचे आयोजन केले.