थेरगावातील मिळकतींच्या रक्षणासाठी सुरक्षारक्षक नेमावेत

वाकड, ता. ९ : थेरगाव परिसरात महापालिकेने केलेली सुशोभिकरणे, उद्याने, महापुरुषांची पुतळे, भवन, विविध विकासकामे, आरक्षणे व महत्त्वपूर्ण मिळकतींचे जतन व रक्षण करण्यासाठी तत्काळ सुरक्षा रक्षकांची नेमणूक करावी व त्या भरतीत स्थानिक भूमिपुत्रांना प्राधान्य द्यावे, अशी मागणी करण्यात आली आहे. महापालिकेच्या मुख्य सुरक्षा अधिकाऱ्यांकडे निवेदनाद्वारे माजी प्रभाग सदस्य संतोष बारणे यांनी मागणी केली आहे.
थेरगाव गावठाणातील कामगार नेते शरद गावडे भवनशेजारीच अनेक दारूचे अड्डे आहेत. रात्री अंधाराचा फायदा घेऊन तळीराम महफीली सजवतात. वस्तूंची तोडफोड करून कचरा करतात. महापुरुषांच्या पुतळ्याची समाज कंटकांकडून विटंबना होऊ नये म्हणून व ‘ग’ क्षेत्रीय कार्यालयासमोरील सेल्फी पॉइंट गार्डनसाठी सुरक्षारक्षक नेमावेत. गेल्या वर्षी १ डिसेंबर रोजीही निवेदनाद्वारे मागणी केली होती मात्र, अद्याप कार्यवाही झाली नाही. येत्या आठ दिवसात सुरक्षा रक्षक नेमावे, अन्यथा आम्ही शिवसेना पक्षाच्या वतीने महापालिकेच्या प्रवेशद्वारावर लोकशाही पद्धतीने आंदोलन करू, असे निवेदनात म्हटले आहे.