ताथवडेत दफनभूमी नको, ग्रामदैवत यात्रेसाठी जागा द्या

वाकड, ता. ९ : ताथवडेतील सर्वे क्रमांक १७४ व १७५ मधील भूखंड हा दफन भूमीसाठी आरक्षित आहे. मात्र, त्या विरोधात ग्रामस्थांनी केलेल्या तक्रारी व हरकतींची दखल घेऊन दफनभूमीचे आरक्षण रद्द करून ती जागा ग्रामदैवत नरसिंह, म्हातोबा हनुमान व दत्तात्रेय देवस्थानसाठी व गावच्या यात्रेसाठी आरक्षित करावी अथवा क्रीडांगण किंवा उद्यान विकसित करावे, अशी मागणी ताथवडे ग्रामस्थांनी केली आहे.
ग्रामदैवत श्री म्हातोबा-हनुमान उत्सव समिती व ताथवडे ग्रामस्थांनी राज्याचे नगरविकास विभाग, खासदार श्रीरंग बारणे व पिंपरी चिंचवड महापालिकेकडे निवेदनाद्वारे मागणी केली आहे. दफनभूमीसाठी आरक्षित करण्यात आलेल्या जमिनीवर बऱ्याच वर्षांपासून ग्रामदैवत श्री नरसिंह व दत्त मंदिर हे जागृत देवस्थान आहे. तेथे दत्त जयंतीसारखे विविध धार्मिक उत्सव होत असतात. त्यामुळे अशा जागेलगत दफनभूमी उभारण्यास ताथवडे ग्रामस्थांचा प्रखर विरोध आहे.
ताथवडे गावात आधीपासूनच एक स्मशानभूमी आहे. त्याच परिसरात परत दफनभूमीसाठी सुद्धा जागा आरक्षित करण्याची आवश्यकता नाही. तसेच आरक्षित जागेच्या आजूबाजूला संपूर्ण रहिवासी क्षेत्र आहे, लहान मुलांच्या शाळा आणि क्रीडांगण आहे. त्यामुळे त्या ठिकाणी दफनभूमी करणे संयुक्तिक ठरणार नाही, असे ग्रामस्थांनी निवेदनात नमूद केले आहे.