वाकडचा भुमकर चौक ‘बॉटलनेक’

वाकड ः हिंजवडी आयटी पार्कमधील अनेक कंपन्यांतील कामगार दररोज सायंकाळी पाचच्या सुमारास टप्प्याटप्प्याने सुटतात. भूमकर चौकातील पूना बेकरी ओलांडली की वाहतूक कोंडी सुरू होते. सोमवारी सायंकाळीही तब्बल अर्धा किलोमीटर लांब वाहनांच्या रांगा लागल्या होत्या. भुयारी मार्गातून जाताना वाहनचालकांची अक्षरशः दमछाक होते. जागोजागी मारावे लागणारे ब्रेक, कर्णकर्कश हॉर्नचे आवाज, दोन-दोन पावलांवर दहा-दहा मिनिटे थांबण्याचा नाइलाज, यामुळे सर्वांचीच घुसमट सुरू होते.

कोंडीची कारणे
- प्रशस्त रस्ते पण, भुयारी मार्ग अतिशय अरुंद
- बॉटलनेक व बेशिस्त वाहनचालकांमुळे चारही बाजूने कोंडी
- भुमकर चौक भुयारी मार्गात साठणारे पाणी व खड्डे
- चौकातील अनधिकृत रिक्षास्टँड, पार्किंग

उपाययोजना
- भूमकर चौक भुयारी मार्ग किमान आठ पदरी करावा
- काळाखडक कोपऱ्याजवळील वळणाऱ्या वाहतुकीसाठी एकेरी मार्ग करावा
- पावसाच्या पाण्याचा निचरा करणे व खड्डे बुजविणे
- काळाखडक चंद्र माऊली गार्डन चौकात बेशिस्त पार्किंग हटविणे

आयटी पार्क हिंजवडीतून वाकडकडे येताना फारसे काही वाटत नाही. मात्र, भुमकर चौक पार करणे म्हणजे मोठ्या अग्निदिव्यासारखे वाटते. भुमकर चौक ओलांडणे आमच्यासाठी सर्वांत मोठी परीक्षा आहे. चौकातून पलीकडे जाताना किमान अर्धापाऊण तास नक्कीच लागतो
- रणजित गडदे, वाहनचालक