पिंपळवनच्या वृक्षारोपण मोहिमेला सुरुवात

वाकड, ता. १४ : पिंपळवन निसर्ग संवर्धन संस्थेच्या पावसाळ्यातील झाडे लावा झाडे जगवा या मोहिमे अंतर्गत वृक्षारोपण मोहीम सुरू झाली असून शनिवारपासून (ता. १२) वृक्षारोपणाला सुरुवात करण्यात आली.
वृक्षमित्र डॉ. हनुमंत बोराटे, अजय पाटुकले, स्वाती कुंभार, सुवर्णा गाडे, गंगाधर चेतक, सतीश गवारे यांच्यासह डाना इंडिया कंपनीचे पदाधिकारी व सर्व कामगार उपस्थित होते. पिंपळवनात वृक्षारोपण करण्यासाठी हिंजवडीतील डाना इंडिया कंपनीकडून रोपटी भेट देण्यात आली. या उपक्रमाचे नियोजन पिंपळवनच्या वृक्षमित्रांनी केले. वृक्षारोपण करताना त्यांच्या योग्य लागवड पद्धतीची प्राथमिक माहिती देऊन वृक्षारोपण सुरू करण्यात आले. पिंपळवनाचे अध्यक्ष चंद्रकांत ववले यांनी कामगारांना झाडे लावा झाडे जगवा व आजच्या परिस्थितीमध्ये तापमान वाढ, झाडांचे महत्व तसेच देशी- विदेशी गवतांची माहिती दिली. गेल्या पाच वर्षांपासून परिसरात निसर्ग संवर्धनाच्या कामाचे सातत्य व योग्य नियोजन पाहून स्वतः हून लोक संस्थेला सहकार्याचा हात देत आहेत. लोकवर्गणीतून वृक्षसंवर्धनासाठी लागणारे दहा पाण्याचे टॅंक व वर्षभरात लागणारा पाण्याचा खर्च तसेच नवीन झाडे खरेदी करून देणे अशा स्वरूपात मदत करून नागरिक मोहिमेत सहभागी होत असतात; तर रोज पंधरा ते वीस व वीकेंडला पन्नास वृक्षसेवक सेवेला हजर असतात.
पिंपळवन संस्था आठ वर्षापासून वृक्षसेवेचे काम करत आहे. संस्थेच्या सदस्यांनी आजपर्यंत सात हजारांहून अधिक झाडे लावली असून २०१७ पासून वृक्षारोपण करुन ते सांभाळण्याची मोहीम चालू केली आहे.

WKD25A09031