रक्षाबंधनाच्या दिवशीही कोंडीची ‘भेट’

वाकड/हिंजवडी, ता. ९ : लाँग विकेंड आणि रक्षाबंधनाचा सण यामुळे बहिणीकडे तसेच मूळगावी जाणाऱ्या वाहनांची संख्या अचानक वाढल्याने शनिवारी (ता. ९) वाकड, हिंजवडी, ताथवडे आणि पुनावळे परिसरातून शहराबाहेर जाणाऱ्या रस्त्यांवर तसेच मुंबई-बंगळूरू महामार्गावर प्रचंड वाहतूक कोंडी झाली. त्यामुळे अनेकांना मनस्ताप सहन करावा लागला.
हिंजवडी आयटी हबमधील रस्त्यांवर नेहमीच रहदारी जास्त असते. परंतु सणासुदीच्या दिवशी खरेदी, प्रवास आणि स्थानिक कार्यक्रमांमुळे वाहतूक कोंडी आणखी तीव्र झाली होती. रक्षाबंधनाच्या निमित्ताने खरेदी, प्रवास आणि नागरिक मोठ्या संख्येने रस्त्यावर आल्याने वाहतुकीवर ताण पडला. विशेषतः हिंजवडी आणि वाकडमधील प्रमुख चौकांमध्ये, जसे की शिवाजी चौक, भूमकर चौक, वाकड चौक ते शेडगे वस्ती रस्ता, जगताप चौक, भुजबळ चौक, लक्ष्मी चौक, माण चौक तसेच ताथवडे, पुनावळे सेवा रस्त्यांवर वाहनांच्या लांब रांगा दिसून आल्या.
वाकड, हिंजवडी, रहाटणी, थेरगाव हा परिसर आयटी बहुल परिसर असल्याने या भागात वास्तव्यास असलेल्या चाकरमान्यांची संख्या अधिक आहे. त्यामुळे या भागांतून गावी जाणाऱ्यांची संख्या अधिक होती. अनेकजण कुटुंबीयांसमवेत गावी निघाल्याने वाहतूक कोंडीत तास न तास अडकून पडले. रक्षाबंधनाच्या सणाच्या उत्साहावर वाहतूक कोंडीने विरजण टाकले.

सणाच्या दिवशी वाहतूक कोंडीमुळे तास न तास रस्त्यावर अडकून राहावे लागले. रक्षाबंधनासाठी खरेदीला जाण्यासाठी निघालो. पण, वाकड ते हिंजवडी रस्त्यावर दीड तास अडकलो.
- जयश्री शिंदे, रहिवासी, वाकड