धक्कादायक; पीएमपी बस चालकाला मारहाण करत बसची तोडफोड

पिंपरी : पीएमपी बस अडवून बसचालकाला बेदम मारहाण करीत बसच्या काचा फोडल्याची घटना जुनी सांगवी येथे घडली. याप्रकरणी सांगवी पोलिसांनी दोघांना अटक केली आहे. 

स्वप्नील बाळासाहेब तिखे (वय 22, रा. पाषाण गाव, पुणे), शुभम अरविंद जाधव (वय 21, रा. जाधव वाडा, पाषाण, पुणे) अशी अटक केलेल्या आरोपींची नावे आहेत. याप्रकरणी श्रीकांत दत्तात्रय भोकरे (वय 31, रा. फुरसुंगी) यांनी सांगवी पोलिस ठाण्यात फिर्याद दिली आहे. फिर्यादी भोकरे हे पीएमपी बस चालक आहेत. ते शनिवारी (ता.30) स्वारगेट-सांगवी या मार्गावरील बसवर कर्तव्यावर होते.

- ताज्या बातम्यांसाठी डाऊनलोड करा ई-सकाळचे ऍप

- पुण्याच्या बातम्या वाचण्यासाठी येथे ► क्लिक करा 

सांगवी येथून पुन्हा स्वारगेट येथे बस घेऊन जात असताना जुनी सांगवी येथे वेताळ महाराज मंदिराजवळ दुचाकीवरून आरोपी आले. आरोपींनी भोकरे यांना शिवीगाळ करीत हाताने मारहाण केली. तसेच बसच्या काचा फोडून नुकसान करून सरकारी कामात अडथळा निर्माण केला. पोलिसांनी दोन्ही आरोपींना अटक केली आहे. सांगवी पोलिस तपास करीत आहेत