पिंपरी : कासारसाई धरणात बुडून दोन महाविद्यालयीन तरुणांचा मृत्यू

पिंपरी - कासारसाई धरणात (Kasarsai Dam) बुडून (Drown) अभियांत्रिकीच्या दोन तरुणांचा (Engineering Students) मृत्यू (Death) झाला. ही घटना गुरुवारी (ता. ३) दुपारी घडली.

शशांक सिन्हा (वय १९), रवीकुमार सोनी (वय १९, दोघेही रा. आकुर्डी, मूळ - बिहार) अशी मृत्यू झालेल्या तरुणांची नावे आहेत. शशांक, रवीकुमार व इतर चार जण आकुर्डी येथील डी. वाय. पाटील अभियांत्रिकी महाविद्यालयात अभियांत्रिकीच्या दुसऱ्या वर्षात शिक्षण घेत होते. हे सर्व जण गुरुवारी कासारसाई धरण परिसरात फिरण्यासाठी गेले होते.

दरम्यान, सर्व जण पाण्यात उतरले. मात्र, पाण्याचा अंदाज न आल्याने ते बुडू लागल्याने त्यांनी आरडाओरडा केला. त्यांचा आवाज ऐकून परिसरातील नागरिकांनी मदतीसाठी धाव घेत चौघांना बाहेर काढले. मात्र, शशांक व रवीकुमार हे दोघे बुडाले. घटनेची माहिती मिळताच पोलिसांनी घटनास्थळी धाव घेतली. दोघांचे मृतदेह पोलिसांनी पाण्याबाहेर काढले. शिरगाव पोलिस अधिक तपास करीत आहेत.