देहूगावमधील कंपनीत थिनर कॅन्डचा स्फोट झाल्याने दोन कामगारांचा मृत्यू 

पिंपरी : कंपनीत थिनरच्या कॅन्डचा स्फोट झाल्याने दोन कामगार भाजले. रुग्णालयात उपचार सुरु असताना दोन्ही कामगारांचा मृत्यू झाला. याप्रकरणी कंपनीच्या मालकावर गुन्हा दाखल झाला आहे. ही घटना देहूगाव येथे घडली. विनोद बाळासाहेब शिंगण (वय २८, रा. इंदिरानगर, बिबवेवाडी, पुणे), मोंटूराम कुमार परशुराम (वय १९, रा. उत्तर प्रदेश) अशी मृत्यू झालेल्या कामगारांची नावे आहेत. तर नीलेश सुभाष भोसले (वय ३९, रा. मोशी) असे गुन्हा दाखल झालेल्या कंपनी मालकाचे नाव आहे. याप्रकरणी पोलिस हवालदार बळीराम चव्हाण यांनी देहूरोड पोलिस ठाण्यात फिर्याद दिली आहे. आरोपी भोसले याची देहूगाव येथे स्मित प्लाझा नावाची कंपनी आहे. २२ मार्चला सायंकाळी कामगार विनोद शिंगण व मोंटूराम परशुराम या कंपनीत वेल्डिंगचे काम करत होते.

हेही वाचा - पुणेकरांनो नीट वाचा; असा असणार आहे ‘विकेंड लॉकडाउन’

दरम्यान, साडेसातच्या सुमारास खाली ठेवलेल्या थिनर कॅन्डचा स्फोट झाला. त्यात विनोद व मोंटूराम हे दोघेही गंभीररीत्या भाजले. विनोद यांना पुण्यातील ससून रुग्णालयात दाखल केले. त्यांचा २६ मार्चला सकाळी उपचारादरम्यान मृत्यू झाला. तर मोंटूराम यांना गुजरात राज्यातील सुरत येथील रुग्णालयात दाखल केले होते. त्यांचाही १ एप्रिलला उपचारादरम्यान मृत्यू झाला. कंपनी मालक नीलेश भोसले याने कंपनीत कामगारांच्या संरक्षणाच्या दृष्टीने कोणतीही उपाययोजना केली नाही. आगीवर नियंत्रण ठेवणारी यंत्रणा अद्ययावत केली नाही. त्यामुळे कामगारांच्या मृत्यूस कारणीभूत ठरल्याप्रकरणी भोसले याच्यावर गुरुवारी (ता.८) रात्री गुन्हा दाखल करण्यात आला. देहूरोड पोलिस अधिक तपास करीत आहेत.