तळेगावात १२ जूनपासून विविध धार्मिक कार्यक्रम

तळेगाव दाभाडे, ता. ९ ः श्री संत तुकाराम महाराज यांचा वैकुंठ गमनाचा त्रिशतकोत्तर अमृत महोत्सव आणि श्री गुरू वि.न. तथा दादा महाराज साखरे यांच्या ८४ व्या पुण्यस्मरण सोहळ्यानिमित्त शाळा चौकातील श्री विठ्ठल मंदिर संस्थेतर्फे १२ ते १९ जूनपर्यंत कीर्तन, प्रवचन आदी विविध धार्मिक कार्यक्रमांचे आयोजन करण्यात आले आहे.
या सोहळ्यानिमित्त श्री विठ्ठल मंदिरात पहाटे महापूजा, गाथा पारायण, प्रवचन, हरिपाठ, कीर्तन आदी धार्मिक कार्यक्रम होणार आहेत. तसेच पंचमवेद श्री संत तुकाराम महाराज गाथा पारायणाचे आयोजनही करण्यात आले आहे. या पाळण्याचे नेतृत्व नथुराम महाराज जगताप-पाटील हे करणार आहेत. विश्वस्त बाळकृष्ण आरडे व यतीन शहा यांनी संपूर्ण कार्यक्रमाचे नियोजन केले आहे.
या सप्ताहात नितीन महाराज काकडे, मधुसूदन महाराज शास्त्री, सागर महाराज पडवळ, यतीराज महाराज लोहार, गणेश महाराज कारले, सच्चिदानंद महाराज कांबेकर, प्रकाश महाराज शिंदे यांची प्रवचन सेवा होणार आहे; तर नितीन महाराज काकडे, मधुसूदन महाराज शास्त्री, तुषार महाराज दळवी, यतीराज महाराज लोहार, गणेश महाराज कारले, सच्चिदानंद महाराज कांबेकर, चिदंबरेश्वर किसन महाराज साखरे यांची कीर्तन सेवा होणार आहे. डॉ. यशोधन महाराज साखरे यांचे काल्याचे कीर्तन होणार आहे. याशिवाय ज्ञानदान, सेवा व अन्नदान सेवेचेही आयोजन करण्यात आले आहे. सप्ताहात दररोज विविध गावांमध्ये भजनाचा जागर कार्यक्रम होणार आहे. तसेच दररोज महाप्रसादाची व्यवस्था ही करण्यात आलेली आहे.