वाकड : मानकर चौक, कस्पटे वस्ती येथील ५२ गाळ्यावर अतिक्रमण कारवाई

वाकड - पिंपरी चिंचवड महानगरपालिका बांधकाम परवानगी व अनाधिकृत बांधकाम नियंत्रण विभाग 'ड' क्षेत्रिय कार्यालयांतर्गत वाकड परिसरातील प्रभाग क्र. २६ मधील वाकड स्मशानभूमी ते सुखवानी पेट्रोल पंप दरम्यान व मुंबई-बंगळूर हायवे वरील वाकड व ताथवडे येथे मंगळवारी (ता. ७) अनधिकृत बांधकामावर कारवाई करण्यात आली. यात १ लाख ८८ हजार चौरस फुट क्षेत्रफळांचे ५४ पत्र्यांचे गाळे काढण्यात आले.

ही कारवाई आणखी तीन दिवस चालणार असून यात प्रमुख्याने फर्निचर व्यावसायिक आहेत. गेल्या महिन्यात या सर्व व्यवसायिकांना नोटीसा बजाविण्यात आल्या होत्या. त्यांनतर ही अतिक्रमणे काढून घेण्याबाबत अतिक्रमण पथकाने आवाहन देखील केले होते. तरी देखील अतिक्रमणे न काढल्याने या व्यवसायिकांवर कारवाई करण्यात आली. तत्पूर्वी बहुतेक व्यावसायिकांनी आपले साहित्य हळविल्याने केवळ सांगाडे पाडण्यात आली. मात्र, या कारवाईबाबत स्थानिक ग्रामस्थ आणि व्याबसायिकांत प्रचंड नाराजी असून विविध मतमतांतरे आहेत.

ही कारवाई अतिरिक्त आयुक्त (२), जितेंद्र वाघ, सह शहर अभियंता मकरंद निक यांच्या मार्गदर्शनाखाली बांधकाम परवानगी अनाधिकृत बांधकाम नियंत्रण विभागाचे कार्यकारी अभियंता सुनिल भागवानी यांच्या नियंत्रणाखाली करण्यात आली. ड-प्रभाग क्षेत्रिय अधिकारी व उमाकांत गायकवाड, उपअभियंता संजय तुपसाखरे, विजय भोजने, नितीन निंबाळकर, मनाली स्वामी, वंदना मोरे, स्थापत्यचे कनिष्ठ अभियंता, सुशिलकुमार लवटे यांनी ८ मनपा पोलीस, वाकड पोलीस स्टेशनचे सहायक पोलीस निरीक्षक, पाच पोलीस कर्मचारी, महाराष्ट्र राज्य सुरक्षा महामंडळाचे साठ सुरक्षा रक्षक, अग्रिशामक विभागाचे अग्निशामक दल, आरोग्य विभागाची रुग्णवाहिका, विद्युत विभागाचे कर्मचारी उपस्थित होते. सदर कारवाईस १ पोकलेन, १० जेसीबी, ४० मजूर, ६ ब्रेकर इत्यादीच्या मदतीने कारवाई करण्यात आली.