'सकाळ'मध्ये झळकले वृत्त अन् पाणीपुरवठा विभागाची कामे झाली सुरू

जुनी सांगवी : जुनी सांगवी परिसरात कोरोना महामारी संकटासोबतच पिण्याचे पाणी गढूळ दूषित पुरवठा होत असल्याने नागरिकांच्या तक्रारी येत होत्या. गढूळ पाण्यामुळे परिसरातील नागरिकांना जुलाब, उलट्याचा त्रास वाढल्याने नागरिकांनी 'सकाळ'कडे पाण्याबाबत व्यथा मांडल्या होत्या. याबाबत बुधवार (ता.१५) जुनी सांगवीत गढूळ पाणीपुरवठा, या शिर्षकाखाली बातमी प्रसिद्ध करण्यात आली होती. याची दखल घेत पाणीपुरवठा विभागाकडून गळणारे वॉल्व्ह,गळतीची ठिकाणे शोधून दुरूस्तीची कामे हाती घेण्यात आली आहेत.

ताज्या बातम्यांसाठी डाऊनलोड करा ई-सकाळचे ऍप   

येथील मधूबन सोसायटी, जयमालानगर, मुळानगर, ममतानगर, जुनी सांगवी फाटा डॉ. बाबासाहेब आंबेडकर चौक येथे दुरूस्तीची कामे सुरू करण्यात आली आहेत. या भागातून नागरिकांच्या मोठ्या तक्रारी आल्या होत्या. याबाबत येथील सामाजिक कार्यकर्ते गणेश निवृत्ती ढोरे म्हणाले, घरातील फिल्टरमधे सुद्धा गाळमिश्रित घाण स्वच्छ करताना निघत असल्याच्या तक्रारी परिसरातील रहिवाशांकडून अजूनही येत आहेत, असे सांगितले.

याबाबत पाणीपुरवठा विभागाशी संपर्क केला असता कनिष्ठ अभियंता एल.ए.वायाळ म्हणाले, परिसरातील लिकेज शोधून अशा सर्व ठिकाणांची दुरूस्तीची कामे सुरू आहेत. कोरोना महामारीचे संकट त्यात लॉकडाऊन व गढूळ पाणी पुरवठ्यामुळे नागरिक दुहेरी संकटाचा सामना करत आहेत. येथील जिल्हा रूग्णालय कामगार वसाहतीत पाणीपुरवठा लाईन शेजारीच ड्रेनेज लाईन लिकेज असल्याचे येथील रहिवाशांनी सांगितले. याद्वारे पाणी मिसळत असल्याची भीती रहिवाशांनी 'सकाळ'शी बोलताना व्यक्त केली होती.

पुण्याच्या बातम्या वाचण्यासाठी येथे ► क्लिक करा

यापूर्वीही अनेकदा येथील दुरूस्त्या करून घेण्याबाबत रहिवाशांनी स्थानिक प्रशासनाकडे मागणी केली होती. मात्र, याची दखल घेतली गेली नसल्याचे नागरिक सांगतात. परिसरात काही ठिकाणी लिकेजमुळे पाण्याची डबकी तयार झाली आहेत. त्याभोवती गवत वाढले आहे. साचून राहिलेल्या पाण्यामुळे दुर्गंधी बरोबरच डास, कीटक, भटकी जनावरे यांचा त्रास कायम सहन करावा लागत आहे. मात्र, याकडे पी.डब्ल्यू.खात्याकडून काहीही कार्यवाही करण्यात आलेली नाही. या विभागाशीही संपर्क साधला असता संपर्क होवू शकला नाही.