Mangala Marathi Movie: 'मंगला'द्वारे उलगडणार एका गायिकेचा थक्क करणारा प्रवास...

New Movie: सध्या सर्वत्र महिलांवर आधारित अनेक कथानक असलेले चित्रपट प्रेक्षकांच्या भेटीस येताना पहायला मिळत आहेत. या चित्रपटांना महिलांचा भरभरून प्रतिसाद मिळत आहे. महिलाकेंद्रित चित्रपटांच्या यादीत आता आणखी एक नवा कोरा चित्रपट प्रेक्षकांच्या भेटीस येण्यास सज्ज होत आहे. या चित्रपटाचे कथानक हा एका गायिकेचा प्रवास मांडणारा आहे. ‘मंगला’ असे या चित्रपटाचे नाव असून नुकतंच या नव्या चित्रपटाचं मोशन पोस्टर समोर आलं आहे.

‘मंगला’ या गायिकेच्या खऱ्या आयुष्यातील खडतर प्रवास या चित्रकथेतून मोठ्या पडद्यावर येणार आहे. मंगलावर झालेला ॲसिड अटॅक आणि त्या कठीण परिस्थितीशी तिने दिलेली झुंज या चित्रपटात पहायला मिळणार आहे. ॲसिड अटॅकसंबंधित कोणताही कायदा त्या काळी नसल्याने योग्य तो न्याय न मिळाल्याने या लढ्याचा सामना मंगलाने कसा केला, अशी खरीखुरी कथा पाहणं रंजक ठरणार आहे.

‘मंगला’ या चित्रपटाचे दिग्दर्शन अपर्णा हॉशिंग यांनी केले आहे. निर्मितीची बाजू अपर्णा हॉशिंग, यशना मुरली, मोहन पुजारी, मिलिंद फोडकर यांनी सांभाळली आहे. चित्रपटाची कथा आणि पटकथा सौरभ चौधरीची असून संवाद प्रथमेश शिवलकर याचे आहेत. संगीत शंतनु घटक याचे आहे. मोशन पोस्टरवर पाठमोरी बसलेली महिला नेमकी कोण आहे, ही भूमिका नेमकी कोणती अभिनेत्री साकारणार, हे अद्याप गुलदस्त्यात आहे.