Swatantra Veer Savarkar : रविवारच्या सुट्टीचा 'स्वातंत्र्यवीर सावरकर' चित्रपटाला फायदा की तोटा? किती झालं वीकेंड कलेक्शन?

Swatantra Veer Savarkar Weekend Collection : 'स्वातंत्र्य वीर सावरकर' हा बायोपिक 22 मार्च रोजी रिलीज झाला होता. या सिनेमामध्ये रणदीप हुड्डा हा स्वातंत्र्यसैनिक विनायक दामोदर सावरकर यांच्या भूमिकेत आहे. या फिल्मचं ओपनिंग डे कलेक्शन ठीकठाक होतं. मात्र शनिवार-रविवारच्या सुट्टीचा फायदा या चित्रपटाला झाला आहे.

सॅकनिल्कने दिलेल्या रिपोर्टनुसार, 'स्वातंत्र्य वीर सावरकर' या चित्रपटाने पहिल्या दिवशी 1.05 कोटी रुपयांचा व्यवसाय केला होता. दुसऱ्या दिवशी या चित्रपटाने 2.25 कोटी रुपयांचा व्यवसाय केला. रविवारच्या दिवशी या चित्रपटाची कमाई 2.60 कोटी रुपये एवढी होती. एकूणच, तीन दिवसांमध्ये या चित्रपटाने एकूण 5.90 कोटी रुपयांचा व्यवसाय केला आहे.

बजेटच्या तुलनेत कमाई कमीच

मीडिया रिपोर्ट्समध्ये मिळालेल्या माहितीनुसार, या चित्रपटाचं बजेट हे सुमारे 20 कोटी रुपये होतं. रणदीप हुड्डाने या चित्रपटासाठी आपलं घरही विकल्याचं एका मुलाखतीत सांगितलं होतं. या चित्रपटाचं दिग्दर्शन देखील त्यानेच केलं आहे. चित्रपटाच्या बजेटच्या तुलनेत वीकेंडला झालेली कमाई अगदीच कमी असल्याचं मत व्यक्त केलं जात आहे.

या चित्रपटासाठी रणदीप हुड्डाने (Randeep Hooda) मोठ्या प्रमाणात मेहनत घेतली आहे. या भूमिकेसाठी त्याने तब्बल 32 किलो वजन घटवलं होतं. रणदीप सोबत या चित्रपटात अंकिता लोखंडे (Ankita Lokhande) देखील प्रमुख भूमिकेत आहे. वीर सावरकर यांच्या पत्नी यमुनाबाई यांची भूमिका अंकिताने साकारली आहे.