'कोरोना' साथीने आपण खरचं काही शिकलोय ?

अभय सुपेकर

कोरोनाच्या महासाथीने जगाला वेढले त्याला आता दोन वर्षे झाली. देशात त्याला अटकावासाठी जगातील अत्यंत कड़क लाॅकडाऊन लावला गेला त्यालाही दोन वर्षे झाली. आता सरकारने परिस्थिती निवळत असल्याने अनेक कडक निर्बंध मागे घेतले आहेत. त्या पार्श्वभूमीवर दोन वर्षांचा घेतलेला मागोवा...

साऱ्या जगाला वेठीला धरणाऱ्या, जगण्याची घडी पुरती विस्कटणाऱ्या, काही दिवसांत अनेकांच्या वाट्याला होत्याचे नव्हते करून सोडणाऱ्या, माणुसकीचा गहिवर आणि माणसामाणसातील स्वार्थीपणा, निर्दयीपणा यांचे दर्शन घडवणारा कोरोना आपण सगळ्यांनीच अनुभवला आहे. काहींची कुटुंबच्या कुटुंब त्याने गारद केली. काहींचे आप्त, नातेवाईक हिरावून नेले. कोरोनाच्या अवतरणाऱ्याला आता दोन वर्षे झाली. तरीही अनेकांचा हुंदका आणि आवंढा काही संपला, यातून कोरोनाने आणलेली दुःखाची किनार लक्षात येते. कोरोनाने आर्थिक कंबरडे मोडले. रोजगार, रोजीरोटी हिरावून नेली. शिक्षणाचा खेळखंडोबा केला. सरकार यंत्रणेतील कमतरता, त्रुटी सगळेच उघड केले. दळणवळण, व्यापार सगळेच ठप्प केले. रेशनसाठी लांबच लांब लागलेल्या रांगा पाहिल्या. जीवाच्या आकांताने गाव जवळ करणारे शहरी भागातील हातमजुरी करणाऱ्यापासून ते सुस्थावर झालेल्यांपर्यंत अनेकांचा मिळेल त्या वाहनाने गावाकडे जाणारा लोंढा पाहिला. दिवसरात्र ऊन-वाऱ्याची तमा न बाळगता घरादारावर तुळशीपत्र ठेवून रस्ता तुडवत जाणारे तांडेही दिसले. त्याच्या अंतःकरण पिळवटणाऱ्या कहाण्या, त्यातून उमटलेल्या वेदनांचे कढ अद्यापही कायम आहेत. कारखाने, उद्योग सगळे, सगळे ठप्प झाल्याने आपण प्रगतीकडून अधोगतीकडे गेले. हे साऱे कोरोनाने घडवले आणि खूप काही शिकवलेदेखील. सरकारने कोरोनाच्या महामारीवर मात करण्यासाठी आपत्ती व्यवस्थापन कायदा 2005 अन्वये मार्गदर्शक सूचना जारी केल्या.सारा देश एका घोषणेसरशी 25 मार्च 2020 रोजी लाॅकडाऊनच्या आदेशाने थिजल्यासारखा ठप्प झाला.