Doctor on a Warfront Book
esakal
स्वाती दामले
डॉक्टर ऑन अ वॉरफ्रंट या पुस्तकातून युद्धामुळे भरडल्या जाणाऱ्या जनतेची केविलवाणी, दयनीय आणि हृदयद्रावक परिस्थिती डोळ्यांसमोर उभी राहते. ‘युद्धस्य कथा रम्या’ असे कितीही म्हटले गेले तरी प्रत्यक्षात त्या अत्यंत भीषण आणि विदारक असतात, हे पुस्तक वाचताना ठायी ठायी जाणवत राहते. पुस्तकातील छायाचित्रांमुळे युद्धाच्या परिणामांची भयानकता वाचकाला अंतर्मुख करते.
रणांगणावरील पराक्रमाच्या रोमांचकारी आणि चित्तथरारक कथा सर्वांनाच आवडतात. या कथा वाचून वाचक भारावूनही जातात. परंतु युद्धभूमीवरील सर्वच कथा फक्त युद्धाशीच संबंधित असतात असे नाही, तर त्याही पलीकडे युद्धाशी निगडित इतर क्षेत्रांमध्ये निडरपणे काम करणारे, मानवतेच्या दृष्टिकोनातून आपली सेवा देणारेही स्त्री-पुरुष असतात. डॉक्टर ऑन अ वॉरफ्रंट हे पुस्तक म्हणजे अशाच युद्धभूमीवर दिल्या गेलेल्या वैद्यकीय सेवेची गाथाच आहे. या पुस्तकाचे लेखक डॉ. भरत केळकर यांना प्रत्यक्ष युद्धभूमीवर जाऊन ही सेवा देण्याची संधी मिळाली. तेथील दाहक परिस्थिती त्यांनी अनुभवली आहे. सेवा करत असताना लोकांच्या उद्ध्वस्त झालेल्या मनांपर्यंत त्यांना पोहोचता आले. त्यांचे हे पुस्तक त्याच अनुभवांवर आधारित आहे.
