Premium|Earringsn Style : डॅझलिंग इअरिंग्ज

सोनिया उपासनीकानातली आपल्या व्यक्तिमत्त्वाचा आरसा ठरू शकतात. योग्य प्रकार, आकार आणि प्रसंगानुसार त्यांची निवड केल्यास स्त्री असो वा पुरुष, तुमच्या संपूर्ण लुकला अप्रतिम ग्लॅमर मिळते. कानातली ही फक्त दागिना नाहीत, तर तुमचे स्टाइल स्टेटमेंट आहे..कानात घालायचे आभूषण अर्थात ‘कानातली’ म्हणजे केवळ दागदागिने घालण्याची परंपरा नाही, तर ती संस्कृती, फॅशन आणि स्वतःची ओळख दाखवण्याचे साधन आहे. भारतात तसेच जगभरात प्राचीन काळापासून स्त्री-पुरुष दोघेही कानात आभूषणे घालत आहेत. योग्य कानातली निवडल्याने चेहऱ्याची शोभा वाढते, कपड्यांना उठाव येतो आणि प्रसंगानुसार एकदम परिपूर्ण लुक मिळतो..स्त्रियांप्रमाणेच पुरुषांनीही कानातल्यांच्या माध्यमातून आपली स्टाइल अधिक ठळकपणे मांडणे, हा एक आत्मविश्वासाचा भाग झाला आहे. राजस्थान, गुजरात, महाराष्ट्र तमिळनाडू यांसारख्या काही राज्यांमध्ये पुरुषही सोन्याची किंवा चांदीची कानातली परंपरेने घालतात. काही आफ्रिकी जमातींमध्ये पुरुष प्रतिष्ठा, वय दाखविण्यासाठी किंवा योद्धा असल्याचे मानचिन्ह म्हणून मोठ्या आकाराची कानातली घालतात. युरोपात मध्ययुगात समुद्री चाचे आणि खलाशी कानातली घालत असत, ते त्यांच्या प्रवासाचे किंवा विजयाचे प्रतीक मानले जाई.तर, अशा या कानातल्यांनी फॅशन जगतात आपले स्थान अढळ राखले आहे. त्यामुळे कानातल्यांचे प्रकार, कोणत्या अंगकाठीला कोणती कानातली शोभतात आणि कोणत्या ड्रेसवर व प्रसंगानुसार कोणती निवड करावी हे बघू या. स्त्री आणि पुरुष दोघांनाही उपयुक्त ठरतील असे प्रकार बघू या..स्टड्स : स्टड्स म्हणजे आकाराने लहान, कानाला लागून बसणारे इअरिंग्ज. मोती, हिरे, क्रिस्टल आणि मेटल यांमध्ये हा प्रकार उपलब्ध असतो. स्टड्समुळे एक साधा पण एलिगंट लुक मिळतो.हूप्स : हूप्स म्हणजे वर्तुळाकार कानातली. ही अगदी लहान-मोठ्या-मध्यम अशा कोणत्याही आकारात मिळतात. सोने, चांदी, ऑक्सिडाइज्ड मेटल, कलरफुल एनॅमल डिझाईन्समध्ये उपलब्ध असतात. चेहऱ्याला फंकी, कॅज्युअल किंवा बोहो टच द्यायचा असेल तर हूप्स निवडावेत.ड्रॉप्स : कानाच्या पाळीपासून खाली लटकणारी म्हणजेच ड्रॉप होणारी ही कानातली. यात साधे किंवा स्टोन असे प्रकार असतात.ऑफिस किंवा पार्टीसाठी योग्य ठरतात.शँडलिअर : ही कानातली जड असतात. अनेक थरांमध्ये रचना असणाऱ्या या कानातल्यांमध्ये मोती, मणी वापरले जातात. पारंपरिक आणि पार्टी वेअरमध्ये हिट ठरू शकतात.झुबे /झुमके : हे पारंपरिक भारतीय डिझाईन आहे. यांचा आकार गोल घंटेसारखा असतो. चांदी, सोने, कुंदन, पोल्कीमध्ये उपलब्ध असतात.इअर कफ्स : कफ्स म्हणजे कानाच्या संपूर्ण कडेला बसणारे मॉडर्न डिझाईन. फ्युजन वेस्टर्न आणि इंडो-वेस्टर्न ड्रेसवर छान दिसतात.टॅसल इअरिंग्स : टॅसल इअरिंग्ज कापडी धाग्यांचे, रंगीत आणि हलके असतात. उन्हाळ्यामध्ये किंवा बीच लुकसाठी किंवा बोहो फॅशन करायची असल्यास हे इअरिंग्ज उत्तम पर्याय ठरू शकतात.बारबेल/हेलिक्स स्टाइल : कानाच्या वरच्या भागात किंवा मध्यभागी बसवलेले मेटल बार म्हणजे बारबेल. ही कानातली पुरुषांना मॉडर्न आणि थोडा एजी लुक देतात.डॅंगल्स : लटकणारे पण साधे असे डँगल्स पुरुष वापरू शकतात. रॉकस्टार्समध्ये किंवा फ्युजन फॅशनमध्ये हा प्रकार लोकप्रिय आहे. तसेच तरुणाईमध्येही जास्त लोकप्रिय आहे.ट्रायबल/ बोहो डिझाईन्स : ही कानातली लाकूड, मणी, पंख असे साहित्य वापरून किंवा हस्तकला असलेल्या डिझाईन्सची असतात..कानातली निवडताना फक्त रंग किंवा डिझाईन बघून चालत नाही, तर आपल्या चेहऱ्याचा आकार आणि अंगकाठीसुद्धा विचारात घ्यावी लागते.गोल चेहरा असेल तर लांबट ड्रॉप्स, टिअर ड्रॉप्स किंवा लांब हँगिंग कानातले वापरावेत. गोलाकार हूप्स टाळावेत, कारण त्यामुळे चेहरा आणखी गोल दिसतो.लांबट चेहरा असेल तर गोल, चौकोनी हूप्स, स्टड्स, झुमके वापरावेत. फार लांब कानातले टाळावेत.चौरस चेहरा असेल तर गोलाकार किंवा वळणदार डिझाईन्स निवडावीत. टोकदार, अँग्युलर कानातली टाळावीत.हृदयाकृती चेहरा असेल तर खाली रुंद आणि वर लहान कानातली (उदाहरणार्थ, टिअर ड्रॉप्स) योग्य ठरतील. मोठे स्टेटमेंट झुमके छान दिसतात.अंगकाठी बारीक किंवा नाजूक असेल, तर लहान स्टड्स, पातळ ड्रॉप्स, मिनिमल डिझाईन्स छान दिसतात.भरगच्च अंगकाठी असेल, तर मोठे हूप्स, जाड डिझाईन्स, स्टेटमेंट इअरिंग्ज शोभून दिसतात..पुरुषांसाठी ड्रेस आणि प्रसंगानुसार कानातलीकॅज्युअल जीन्स-टीशर्टवर मेटल हूप्स, स्टड्स, ट्रायबल डिझाईन.फॉर्मल सूटवर साधे सिल्व्हर किंवा डायमंड स्टड्स.स्ट्रीट स्टाइल/ पार्टीमध्ये बोल्ड हूप्स, डॅंगल्स, स्टेटमेंट पीस.पारंपरिक पोशाखावर (उदाहरणार्थ, शेरवानी, कुर्ता) सोन्याचे किंवा ऑक्सिडाइज्ड छोटे कानातले..स्त्रियांसाठी ड्रेसनुसार कानातलीसिल्क किंवा पारंपरिक साडीसोबत सोन्याचे किंवा कुंदन झुमके, शँडलिअर इअरिंग्ज.कॉटन साडीसोबत ऑक्सिडाइज्ड सिल्व्हर झुमके.सलवार-कुर्ता/ पंजाबी ड्रेसवर रंगीत झुमके, पोल्की, मिररवर्क ड्रॉप्स.वेस्टर्न ड्रेसमध्ये शॉर्ट ड्रेसवर स्टड्स, मिनिमल हूप्स; लाँग गाऊनवर शँडलिअर, स्टोन ड्रॉप्स.ऑफिस वेअरवर पर्ल किंवा स्टोन स्टड्स, छोटे ड्रॉप्स, मिनिमल हूप्स.कॅज्युअल जीन्स-टॉपवर टॅसल, हूप्स, बोहो इअरिंग्स.स्त्री असो वा पुरुष प्रसंगानुसार कानातल्यांचा वापर करावा -लग्न सोहळा किंवा समारंभात कुंदन, पोल्की, शँडलिअर, सोन्याचे झुमके छान दिसतात. ड्रेसशी जुळणारे रंगीत स्टोन्सही छान दिसतात.दिवाळी, गणेशोत्सव अशा सणांना पारंपरिक सोने किंवा ऑक्सिडाइज्ड, मोती जडवलेले कानातले शोभून दिसतात.ऑफिस मीटिंग/ फॉर्मल इव्हेंटमध्ये साधे स्टड्स, मोत्याचे ड्रॉप्स, मेटल हूप्स घालावेत.कॅज्युअल आउटिंग/ पिकनिक असले, तर टॅसल, बीड्स, हलक्या हूप्सचा पर्याय निवडावा.पार्टी/ नाइटआऊटप्रसंगी स्टेटमेंट इअरिंग्ज, ग्लिटर, शिमर असलेले ड्रॉप्स वापरावेत.कानातली निवडताना काही टिप्स लक्षात घेतल्या, तर मस्त स्टाइल स्टेटमेंट करता येते. फेस हायलाइट करणे महत्त्वाचे असते, त्यामुळे चेहऱ्याच्या रंगाशी विरोधी किंवा पूरक रंग निवडावा. स्वतःच्या सोयीनुसार कानातली वापरावीत. फार जड कानातली बऱ्याच तासांसाठी घातल्यास कान दुखू शकतात. ड्रेसचा गळा बघून कानातली निवडावीत. हाय नेक ड्रेससोबत लांब कानातली टाळावीत. केसांची स्टाइलही विचारात घ्यावी. केस मोकळे असतील, तर मोठी कानातली अधिक स्पष्ट दिसून येतात.कानातली आपल्या व्यक्तिमत्त्वाचा आरसा ठरू शकतात. योग्य प्रकार, आकार आणि प्रसंगानुसार त्यांची निवड केल्यास स्त्री असो वा पुरुष, तुमच्या संपूर्ण लुकला अप्रतिम ग्लॅमर मिळते. कानातली ही फक्त दागिना नाहीत, तर तुमचे स्टाइल स्टेटमेंट आहे.(सोनिया उपासनी पुणेस्थित फॅशन डिझायनिंग तज्ज्ञ आहेत.).सकाळ+ चे सदस्य व्हा ब्रेक घ्या, डोकं चालवा, कोडे सोडवा!शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.

Premium|Earringsn Style : डॅझलिंग इअरिंग्ज

Related Stories