Share Market Crash 2026
esakal
भूषण महाजन
रशिया-युक्रेन युद्धात किंवा इस्राईल-हमास युद्धात बाजार पडले, पण कमी-अधिक वेळात सावरले, कारण त्या युद्धांचा परिणाम जोखता आला. अमेरिकेने व इस्राईलने २८ फेब्रुवारी रोजी इराणवर हल्ला केला; तो धक्का बाजाराने पचवला. पण खरा धक्का होर्मुझ सामुद्रधुनी बंद होण्याचा होता. ते इराणने केल्यामुळे जागतिक पुरवठा साखळीच्या नाड्या आवळल्या गेल्या. कंटेनर तुटवडा, विमा खर्च वाढणे व वेळ लागणे हे अपेक्षित नव्हते. भारतीय बाजार प्रमाणाबाहेर घसरले ते यामुळे...
बिबट्या आणि साळींदर यांच्यातील संघर्ष ही निसर्गातील एक अतिशय थरारक आणि धोकादायक घटना मानली जाते. बिबट्या हा एक अत्यंत चपळ शिकारी आहे, तर साळींदराच्या अंगावर स्वतःच्या संरक्षणासाठी अणकुचीदार काट्यांचे कवच असते. साळींदराचे मांस लुसलुशीत असल्यामुळे बिबट्याला त्याच्या शिकारीचा मोह पडतो. एक पंजा मारला तर साळींदर अर्धमेले होते हे जरी खरे असले, तरी जेव्हा बिबट्या हल्ला करतो, तेव्हा साळींदर आपले शरीर फुगवून काटे उभे करते. जर बिबट्याने पंजा मारला किंवा तोंड लावले, तर हे काटे त्याच्या शरीरात, विशेषतः चेहरा, डोळे आणि पायात आतपर्यंत घुसतात आणि अत्यंत जीवघेणे ठरू शकतात. नाकातोंडात गेलेले काटे बिबट्याला पुरते नामोहरम करून टाकतात. हे सारे आठवण्याचे कारण म्हणजे सध्या सुरू असलेला अमेरिका-इराण संघर्ष. इराणवर हल्ला करून त्यांचे वरिष्ठ नेतृत्व अमेरिकेने कापून काढले खरे, पण ते राष्ट्र कडवे असल्यामुळे तिथे नवे नेतृत्व तयार होईल आणि ते हार मानणार नाही. तात्पर्य असे, की या युद्धाने आज साऱ्या जगालाच वेठीस धरले आहे.