Subjective well-being and life satisfaction
esakal
अमृता देसर्डा
आनंद व्यक्तीसापेक्ष आहे. तो मानवी मन, घडून गेलेल्या घटना आणि माणसाच्या विचारप्रक्रियेवर अवलंबून असतो. आनंदी राहणं ही मनाची, शरीराची अनोखी अशी अवस्था आहे, जी मोठ्या कौशल्यानं जपावी आणि रुजवावी लागते. आपण एखाद्या रोपाचं जसं संगोपन करतो, तसं या आनंदरूपी बीजाचं उत्तम संगोपन करून ते वाढवायला हवं!
‘‘हल्लीची पिढी खूप कॅज्युअल आहे. त्यांना सगळं मिळतं, त्यांच्या जगण्यात कसलाच अभाव नसतो; त्यांना काय समजणार खरा आनंद काय असतो?’’ एक सत्तरी ओलांडलेल्या आज्जी बागेत बसून त्यांच्या मैत्रिणीशी बोलत असताना हा संवाद कानावर पडला.
मनात असंख्य प्रश्न दाटून आले. खरंच हल्लीची पिढी अशी आहे? त्यांना त्यांच्या आयुष्यात कुठलाच अभाव अनुभवायला मिळाला नसेल? खरा आनंद काय हे त्यांना माहिती नसेल? तो कशात आहे हे त्यांना सांगता येईल? असे प्रश्न मनात आले आणि मी त्यांची उत्तरं शोधण्याच्या निमित्तानं लोकांशी बोलायचं ठरवलं.