Sustainable Urban Farming India
esakal
डॉ. तृप्ती करेकट्टी / डॉ. दिलीप माळी
पुढील काही लेखांमधून आपण शहरामध्ये गच्चीवर आपला ‘ग्रीन कॉर्नर’ कसा निर्माण करता येईल, याची माहिती घेणार आहोत. गच्चीवरील पाण्याचा योग्य निचरा, छताची घ्यायची काळजी, सेंद्रिय-नैसर्गिक पद्धती या दोहोंमधील फरक यांपासून ते कुंड्यांची निवड, कम्पोस्टिंग, कोणत्या सीझनमध्ये कोणत्या भाज्या लावाव्यात; फळझाडे, औषधी वनस्पती, कंदमुळे, हायड्रोपोनिक्स आणि व्हर्टिकल गार्डनसारखे नवीन पर्याय या आणि इतर अनेक संबंधित गोष्टींची माहिती आपण घेणार आहोत.
‘वृक्षा ये नव पालवी, सृष्टीचे चैतन्य मोहरले’ - माझ्या आजीच्या कवितेतील ही कोवळ्या पोपटी रंगाची ओळ, मॉन्सूनपूर्व पाऊस झाल्यावर आता इथे-तिथे सर्वत्र प्रत्यक्ष साकार होऊ लागली आहे. मनभावन वर्षाऋतूचे स्वागत करण्यासाठी नव-प्रस्फुटीत कोमल पल्लवांची तोरणे बांधून वृक्षवल्ली सजल्या आहेत. गावाकडे शेतांमध्ये कामाची लगबग सुरू आहे. पावसाला सुरुवात व्हायच्या आत राने तयार व्हायला हवीत. नांगरून ठेवलेल्या रानांतून कुळव फिरताहेत. कुठे शेणखत घालून जमिनीला सुपीक करण्यासाठी खुराक देणे सुरू आहे, तर कुठे सरी पाडणे सुरू आहे. बगळे कुळवाच्या आगेमागे किडे पकडायला तुरुतुरु धावत आहेत. भुसभुशीत केलेल्या काळ्याशार मातीच्या सरींमध्ये उभ्या शुभ्र बगळ्यांची नक्षी लक्ष वेधून घेत आहे. नवीन रसरशीत सृष्टी तयार करण्यासाठी धरा जशी पावसाची आतुरतेने वाट पाहती आहे, तशीच काहीशी अवस्था पशुपक्षी आणि माणसाच्या मनाचीही आहे.
