Premium| Stock Market Forecast: शेअर बाजारात आशा की सावधानी?

भूषण महाजनएप्रिल-मेच्या कडक उन्हाळ्यात वळवाचा पाऊस पडला तर धांदल उडतेच, पण तो पाऊस जिवाला गारवा देतो. तसाच गारवा भारतीय शेअर बाजारात सात मार्चला संपलेल्या सप्ताहात अनुभवायला मिळाला. आता हा पाऊस वळवाचा की मृगाचा ते कळेलच! सलग चार आठवडे निर्देशांक खाली आल्यानंतर त्या सप्ताहात प्रथमच थोडी तेजीची झुळूक आली. .निफ्टी २१९६१चा तळ गाठत २२५५२ अंशावर बंद झाली. शेअर बाजार ४-५-६-७ मार्च असे चारही दिवस समाधानकारक वरची चाल खेळू शकला. निफ्टी, निफ्टी ५००, निफ्टी ऑटो, मेटल, कमॉडिटी हे सारेच निर्देशांक ४ मार्च रोजी तळ करून वर जाताहेत असे आलेखात दिसते. त्याचबरोबर पाच मोठ्या उद्योगांचा एक नवा निर्देशांक एनएसईने काढला आहे. त्यात अंबानी, अदानी, महिंद्रा, आदित्य बिर्ला आणि टाटा समूहाच्या मुख्य शेअरचा समवेश आहे. हा निर्देशांकसुद्धा डोके वर काढतोय. त्यावरून बरेच दिवस दुर्लक्षित असलेले अदानी पोर्ट, रिलायन्स इंडस्ट्रीज, महिंद्रा, हिंदाल्को वगैरे शेअर डोळ्यासमोर ठेवावे असे वाटते..आता तेजी सुरू झाली असे समजायचे, की ह्या तेजीत नफा वसूल करायचा हा निवेशकांचा मुख्य प्रश्न! आम्हाला वाटते की शेअर बाजार आता तरी गोंधळलेला आहे. मंदीची अखेर जवळ आली आहे हे नक्की, पण आत्मविश्वासपूर्वक खरेदी करण्यासाठी मार्चअखेरचे निकाल तपासावे लागतील. धाडसी गुंतवणूकदार येथे सुरुवात करू शकतात, पण फक्त निवडक शेअरमधेच! मिड कॅप शेअरना खाली यायला अजून जागा आहे. फंडात गुंतवणूक करणारे गुंतवणूकदार आपापल्या जोखीम क्षमतेप्रमाणे फोकस किंवा फ्लेक्झी कॅप फंडाचा विचार करू शकतात. सध्यातरी मार्च महिन्यात बाजार स्थिर राहील असे दिसते. असो..महंमद तुघलकाची कल्पनाशक्ती अपारच होती. त्यातूनच अफगाण आक्रमकांपासून दूर राहण्यासाठी राजधानी दिल्लीहून दौलताबादला हलवण्याची शक्कल निघाली! या हलवाहलवीत उपासमारीने अनेकजण बळी पडले ते सोडा. पण पाच-सहा वर्षे त्याने दख्खनहून राज्यही केलं, आणि मग पुन्हा निर्णय बदलून राजधानी दिल्लीला हलवली. तीच तऱ्हा सरकारी तिजोरीची! सोन्याऐवजी तुघलकाने तांब्याची नाणी सुरू केली. लोकांनी जुन्या सोन्याच्या मोहरा घरात ठेऊन तांब्याच्या नाण्यांनी व्यवहार सुरू केले. शेवटी खजिना रिता झाल्यावर पुन्हा निर्णय बदलावा लागला. तुघलकाला ७०० वर्षानंतर खरा वारस मिळाला, ट्रम्प ह्यांच्या रूपाने! आता संवादाची माध्यमे प्रगत झाल्यामुळे निर्णय बदलायला एक दिवसदेखील पुरतो. .त्याचा पुरेपूर फायदा घेऊन ट्रम्प आपले निर्णय बदलत असतात. सतत जगावर आगपाखड करत निर्णयावर ठाम न राहण्याची कला त्यांना चांगलीच साधली आहे. शेवटी कुठल्या देशावर किती आयातकर लावणार हे अजूनही गुलदस्त्यातच आहे. तुघलकासारखं त्यांनी पण स्वत:चे ट्रम्प कॉइन काढले आहे. पुढे ह्या कॉइनने डॉलरची जागा घेतली नाही म्हणजे मिळवली! विनोदाचा भाग जरी सोडला तरी धोरण लकवा आणि धोरण धरसोड एकाच नाण्याच्या दोन बाजू आहेत. तिथले कारखानदार धोरण निश्चितीची वाट पाहत आहेत. कुठल्याही देशात गुंतवणूक करताना स्थिर सरकार, सुरक्षित सीमा आणि उद्योगस्नेही धोरण आवश्यक असते. अमेरिकेत ह्या साऱ्या गोष्टी आहेत. कमी आहे ती फक्त, निश्चित ध्येयाकडे वाटचाल करणारे व चार वर्षे टिकेल अशा धोरणाची! .मेक अमेरिका ग्रेट अगेन असे म्हणण्याने अमेरिका मोठी होणार नाही. प्रत्येक निर्णयाच्या मागे ठोस विचार व प्रक्रिया हवी. तसे दिसत नाही. तात्पर्य असे, की अर्थव्यवस्थेतील गुंतवणूकदारांचा विश्वास वाढला पाहिजे अशी योजना आखायला हवी. तसे ते होईल अशी आशा करूया. नुकतेच ट्रम्प ह्यांनी तेथील संसदेत दीड तासाचे लांबलचक भाषण केले. मेक्सिको, कॅनडा व चीन ह्या देशांवरील टॅरिफ वाढवेनच असे त्यांनी पुन्हा बजावले. ट्रम्प ह्यांचे जणू काही मुखपत्र असलेल्या वॉल स्ट्रीट जर्नलनेदेखील ह्यापेक्षा अधिक बिनडोक धोरण (Dumbest move ever) असूच शकत नाही असे म्हटले आहे. पण लक्षात कोण घेतो?.अमेरिकन अर्थव्यवस्थेचा डेटा फारसा स्फूर्तिदायक नाही. बेरोजगारी वाढली आहे. भारतीय बाजार जर महाग म्हटले तर तेथील बाजारही महागच आहेत. नॅस्डॅकचे पी/ई गुणोत्तर ३८.८९ आहे आणि नॅस्डॅक १००चे ३३.५९. सर्वसमावेशक रसेल २०००चे (आपल्या एनएसई ५००सारखा निर्देशांक) पी/ई गुणोत्तर ३० आहे. जेमतेम डाऊ जोन्स निर्देशांकच काय तो आपल्या लार्ज कॅपसारखा १९.८३च्या गुणोत्तरात आहे. त्यात चीनने विकसित केलेल्या डीपसीकने अमेरिकेची झोप उडवली आहे. अमेरिकेचे बॉण्ड यील्ड्स कमी होताना दिसतात. डॉलर निर्देशांक ११०वरून १०४जवळ आला आहे. भारतीय चलनावरचा ताण त्यातून कमी होईल..जर्मनी चालू आर्थिक वर्षात एक लाख कोटी युरो खर्च करणार आहे. त्यातील ५० हजार कोटी पायाभूत सुविधा आणि ५० हजार कोटी संरक्षण सिद्धतेसाठी गुंतवले जातील. त्यातून निष्कर्ष एकच! अमेरिकेत गेलेले भांडवल आता युरोपकडे वळू शकते.अमेरिकेबरोबर रशिया व इराणच्या धर्तीवर द्वीपक्षीय करार करण्यासाठी आपले परराष्ट्र खाते काम करीत आहे. तसे झाल्यास भारताला स्वतंत्र वागणूक मिळू शकते. चीनच्या सतत प्रयत्नातून धातू बाजार पुन्हा वाढेल असे दिसते. त्यात खनिज तेल ६५ डॉलर प्रति बॅरल मिळत आहे. भारताच्या दृष्टीने ही अत्यंत आनंदाची बातमी आहे. ट्रम्प ह्यांच्या आग्रहामुळे रशिया-युक्रेन संघर्ष थांबला, तर ते जागतिक व्यापाराच्या मागे पडलेल्या वृद्धीच्या पुनर्स्थापनेसाठी चांगले ठरेल. रिझर्व्ह बँक अर्थव्यवस्थेचा रोकड प्रवाह वाहता ठेवण्यासाठी प्रयत्न करीत आहे. गेल्या दोन महिन्यात रिझर्व्ह बँकेने काही निर्बंध सैल केल्यामुळे किमान अडीच लाख कोटी रुपये बँकांकडे जमले आहेत. त्यातून तरलता वाढली आहे. लघु व मध्यम उद्योगांना कर्जवाटप आता अधिक सुलभ होईल..छोट्या गुंतवणूकदारांनी आता तोट्याचा फायदा करून घेतला पाहिजे. शॉर्ट टर्म नफ्यावर २० टक्क्यांनी कर भरावा लागतो. तोट्याची मशागत करताना आता पोर्टफोलिओचे सिंहावलोकन केले पाहिजे. (या विषयावर मागे आम्ही दाग अच्छे है हा लेख लिहिला होता.) आपला निर्णय जिथे चुकला आहे त्या शेअरमधून निग्रहाने बाहेर पडावे. त्यातील जे काही शेअर पुन्हा वर जातील असे वाटते, ते विकल्याच्या दुसऱ्या दिवशी किंवा त्यानंतर महिनाभरात कधीही, दर बघून पुन्हा विकत घ्यावेत. म्हणजे आपल्या भांडारात काही बदल होणार नाही पण करदायित्व कमी होईल..Premium: Mutual Funds:उत्तम म्युच्युअल फंडांसाठी....सामान्य गुंतवणूकदाराच्या हातात यापुढे स्वत:चा फोलिओ आत्मविश्वासाने जोपासणे इतकेच आहे. वेळोवेळी बोनस देणाऱ्या पण लाभांश न देणाऱ्या कंपन्यांपासून दूरच राहिले पाहिजे. लाभांश अत्यंत महत्त्वाचा असतो. कारण त्यातून कंपनीच्या कॅश फ्लोचा अंदाज येतो. फक्त बोनस शेअर देऊन काहीच साधत नाही. वाढीव भांडवल कसे सर्व्ह करणार तेही बघायला हवे. निवेशासाठी शेअर निवडताना व्यवस्थापनाचा प्रामाणिकपणा, पारदर्शकता, शासन व अनुपालन ह्या गुणांकडे अधिक लक्ष द्यायला हवे. स्वतंत्र संचालक कोण आहेत, बोर्डाच्या किती बैठकींना ते हजर असतात व त्यात त्यांचा काय सहभाग असतो हे लक्षपूर्वक बघितले पाहिजे, तरच आपला आपल्या निवडीवरचा विश्वास वाढेल. प्रत्येक गुंतवणूकदार भावनेच्या भरात निर्णय घेणार नाही, अशी अपेक्षा आहे..Premium: Debt Fund: डेट फंडांसाठी अनुकूल वातावरण .आम्हाला वाटते की शेअर बाजार आता तरी गोंधळलेला आहे. मंदीची अखेर जवळ आली आहे हे नक्की, पण आत्मविश्वासपूर्वक खरेदी करण्यासाठी मार्चअखेरचे निकाल तपासावे लागतील. धाडसी गुंतवणूकदार येथे सुरुवात करू शकतात, पण फक्त निवडक शेअरमधेच! मिड कॅप शेअरना खाली यायला अजून जागा आहे. फंडात गुंतवणूक करणारे गुंतवणूकदार आपापल्या जोखीम क्षमतेप्रमाणे फोकस किंवा फ्लेक्झी कॅप फंडाचा विचार करू शकतात. सध्यातरी मार्च महिन्यात बाजार स्थिर राहील असे दिसते.(भूषण महाजन शेअर बाजाराचे पुणेस्थित विश्लेषक आहेत.)महत्त्वाचे : या लेखात सुचवलेले शेअर अभ्यासपूर्वक गुंतवणुकीसाठी आहेत. शेअर बाजाराच्या जोखमीचे आकलन करून आपापल्या सल्लागाराचे मत व सल्ला घेऊनच गुंतवणूक करावी. शेवटी स्टॉपलॉसला पर्याय नाही, हे लक्षात ठेवावे. तसेच लेखकाने व त्यांच्या गुंतवणूकदारांनी येथे गुंतवणूक केलेली आहे, हेही ध्यानात घ्यावे..सकाळ+ चे सदस्य व्हा ब्रेक घ्या, डोकं चालवा, कोडे सोडवा!शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.

Premium| Stock Market Forecast: शेअर बाजारात आशा की सावधानी?

Related Stories

निर्देशांकांमध्ये किंचित वाढ

Stock Market Today: सलग दुसऱ्या दिवशी शेअर बाजार घसरला! सेन्सेक्स 600 अंकांनी कोसळला; IT सेक्टरला धक्का; मात्र हे शेअर्स वाढले

Premium|Share Market Analysis : युद्ध, आयटी निकाल व वेदांत विभाजनाच्या पार्श्वभूमीवर गुंतवणूकदारांनी काय करावे?