Perito Moreno Glacier Argentina
esakal
उमेश झिरपे - umzirpe@gmail.com
पेरिटो मोरेनो हिमनदीचा पर्यावरणीय परिणामही महत्त्वाचा आहे. या हिमनदीतून वितळणारं पाणी लेक अर्जेंटिनोमध्ये मिसळतं आणि पुढे नदीप्रणालीत जातं. त्यामुळे स्थानिक परिसंस्था, वनस्पती आणि प्राणिजीवन यावर तिचा प्रभाव पडतो. पॅटागोनिया प्रदेशातील हवामान अत्यंत बदलतं. येथे पर्जन्यमान जास्त आहे, वारे प्रचंड आहेत आणि तापमानात सतत चढउतार होत असतात. या सर्व घटकांचा परिणाम हिमनदीच्या प्रवाहावर आणि वितळण्यावर होतो.
हिमनदी म्हणजे संथ, शांत आणि हजारो वर्षांच्या कालखंडात बदलणारी रचना, हा आपला सर्वसाधारण समज. हिमालयात किंवा आल्प्समध्ये आपण पाहिलेल्या हिमनद्यांनी ही प्रतिमा पक्की केली आहे. पण पृथ्वीवर काही हिमनद्या अशा आहेत, ज्या या सगळ्या समजुती मोडून काढतात. त्या केवळ संथ नाहीत; त्या जिवंत आहेत. त्या आवाज करतात, तुटतात, पुन्हा घडतात आणि त्यांच्या हालचाली डोळ्यांसमोर घडताना दिसतात. अर्जेंटिनातील पॅटागोनिया प्रदेशात वसलेली पेरिटो मोरेनो हिमनदी ही अशीच एक जिवंत, सतत बदलणारी आणि प्रचंड ऊर्जा असलेली हिमनदी आहे.
