#SaathChal आई-वडिलांच्या सेवेची वैष्णवांच्या साक्षीने शपथ

पिंपरी - आषाढी वारीसाठी पंढरपूरकडे निघालेला तुकोबारायांचा पालखी सोहळा देहूकरांचा निरोप घेऊन मंगळवारी (ता. २५) सायंकाळी आकुर्डी येथील विठ्ठल मंदिरात मुक्कामी पोचला. टाळ-मृदंगाच्या गजरात ‘ज्ञानोबाऽ तुकाराम’चा जयघोष झाला. पालखी रथातून उतरवून मंदिरात पोचविल्यानंतर समाज आरती झाली. त्या वेळी देहू संस्थानचे अध्यक्ष, सोहळा प्रमुख व विश्‍वस्तांतर्फे उपस्थित भाविकांना ‘आई-वडिलांच्या सेवेची’ शपथ देण्यात आली.

‘ज्ञानोबा माउली तुकाराम’ नामाचा अखंड सुरू असणारा गजर, टाळ-मृदंगात दंग झालेले वारकरी, अशा वातावरणात भाविकांनी संत तुकाराम महाराजांच्या पालखीचे आकुर्डीच्या विठ्ठल मंदिरात स्वागत केले. सायंकाळी सातच्या सुमारास मानाचे अश्‍व, विणेकरी यांच्यासह पालखी मंदिरात दाखल झाली. भाविकांनी पालखीच्या दर्शनासाठी गर्दी केली होती. ‘सकाळ माध्यम समूह’ आणि ‘फिनोलेक्‍स केबल्स’ यांच्यातर्फे आषाढी वारीनिमित्त आयोजित ‘साथ चल’ उपक्रमाला शहरातील नागरिक व वारकऱ्यांनी भरभरून प्रतिसाद दिला. माणिक महाराज मोरे यांनी भाविकांना ‘आई-वडिलांची सेवा’ करण्याची शपथ दिली. दरम्यान, विठ्ठल मंदिर परिसरात सकाळपासून विठुनामाचा गजर सुरू होता. दुपारनंतर जत्रेचे स्वरूप आले. आवारात आकर्षक रांगोळी काढली होती. अनेकांनी इमारतींवर उभे राहून सोहळा अनुभवला.