पुणे जिल्ह्यात गुरूवारी दिवसभरात १,६५३ नवे कोरोना रुग्ण; १३ जणांचा मृत्यू

पुणे - पुणे जिल्ह्यात (Pune District) गुरूवारी (ता.१०) दिवसभरात एक हजार ६५३ नवे कोरोना रुग्ण (Corona Patients) आढळून आले आहेत. याऊलट दिवसभरात ४ हजार १२९ जणांनी कोरोनावर मात केली आहे. अन्य १३ जणांचा कोरोनाने मृत्यू (Death) झाला आहे. दिवसभरातील जिल्ह्यातील एकूण मृत्यूमध्ये पुणे शहरातील सात, पिंपरी चिंचवडमधील पाच आणि जिल्हा परिषद कार्यक्षेत्रातील एक मृत्यू आहे. नगरपालिका आणि कॅंटोन्मेंट बोर्ड क्षेत्रात दिवसात एकाही कोरोना रुग्णाचा मृत्यू झाला नाही.

जिल्ह्यातील दिवसातील एकूण नवीन रुग्णांमध्ये पुणे शहरातील सर्वाधिक ६६८ रुग्ण आहेत. दिवसात पिंपरी चिंचवडमध्ये ४०२, जिल्हा परिषद कार्यक्षेत्रात २९४, नगरपालिका हद्दीत ५३ आणि कॅंटोन्मेंट बोर्ड क्षेत्रात ३६ नवे रुग्ण आढळून आले आहेत. दिसभरातील एकूण कोरोनामुक्तांमध्येही पुणे शहरातील सर्वाधिक २ हजार १४१ जण आहेत. पिंपरी चिंचवडमधील १ हजार ७९, जिल्हा परिषद कार्यक्षेत्रातील ७१०, नगरपालिका हद्दीतील १६१ आणि कॅंटोन्मेंट बोर्ड क्षेत्रातील ३८ जण कोरोनामुक्त झाले आहेत.

दरम्यान, पुणे जिल्ह्यातील एकूण सक्रिय कोरोना रुग्णांची संख्या गुरूवारी १७ हजार ३४३ झाली आहे. एकूण सक्रिय रुग्णांपैकी शहर व जिल्ह्यातील विविध रुग्णालयांमध्ये मिळून १ हजार ३०४ रुग्णांवर उपचार सुरू आहेत. उर्वरित १६ हजार ३९ जण गृह विलगीकरणात आहेत.